Sa gihapon sayon ra tang sudlon

Hangtod karon dili pa gyod gihapon ta makaseguro sa atong internal nga seguridad kini tungod sa yano ra kaayong pagsulod, sunod-sunod nga pagsulod sa mga barkong langyaw sa atong nasud nga wala ta masayod. Kini usa ka buhing kamatuoran sa kahoyang gihapon sa atong internal nga seguridad.

Unang nabulgar ang kahuyang sa atong internal nga seguridad mao ang pagkasangad sa barkong gipanag-iya sa mga Tsino nga nakasulod sa atong teritoryo nga wala mabantayi sa atong mga Coast Guards ug Navy. Kun wala pa masangad ang barkong Tsino dili gyod ta masayod sa ilang pag-abot, maong salamat sa ilang pagkasangad. Pero kun nabantayan man nato ang ilang pag-abot tungod sa ilang pagkasangad, milanat usab una kini og pipila ka adlaw sa wala pa kini madiskobrihi sa atong Coast Guard ug Navy. Kun ang ilang pagsulod sa atong teritoryo mao pa ang pagpakiggubat sa Pilipinas, mao na lang seguro’y atong namat-an nga nasakop na ta sa China.

Dili bag-o nato nga adunay mga langyaw nga barko nga nakasulod sa atong nasud nga wala ta masayod tungod kay daghan na silang nag-una pa. May nag-una pa niining maong hitabo diin mga barko gihapon nga gikan sa China ang nakasulod sa atong teritoryo ug nanguha sa atong mga natural resources.

Karon aduna na usa’y laing barko nga Tsino nga nakasulod sa kadagatan sa Visayas nga wala gihapon mahibaw-i sa mga sakop sa Coast Guard ug Navy. Unya, milanat gihapon og pipila ka adlaw una pa kini mahibaw-i sa atong mga awtoridad. Ang barkong MV Ming Yuan kaniadto pa diay’ng Mayo 19 ning tuiga niabot kay magkuha sa balas sa Isabel, Leyte apan niini nang hinapos nga bahin sa Hunyo madiskobrihi nga nakaangkorahi sa isla sa Malapascua sa lalawigan sa Sugbo.

Kay ang barko nga Tsino miabot nga wala nato masayri motoo ba lang dayon ang atong mga awtoridad sa pamahayag sa mga tripulante niini nga miabot sila sa Pilipinas kay magkuha lang og balas?

Kining barkong miabot wala kaha kini magdala og kagaw o ba kaha basura nga ilang gilabay sa atong kadagatan? Kining barkong Tsino nga miabot nga wala nato mahibaw-i wala kaha ni ipadala sa ilang nasud aron panid-an ang atong kalihokan para sa ilang nasudnong interest? Angayan hinumdoman sa atong nasudnong kagamhanan nga kadaghan na migamit ang China sa ilang mga sundawo aron sudlon ug panid-an ang atong teritoryo pinaagi sa pagpakaaron-ingnon nga sila mananagat.

Ang sunod-sunod nga pagsulod sa mga barkong langyaw sa atong nasud nga wala ta masayod makapaalarma na kun hisgotan ang atong internal nga seguridad. Busa kun dili gusto ang atong gobyerno nga magmata lang og morning kinahanglan na kining mohimo og tukmang lakang mentras dili pa ulahi ang tanan.