EDITORIAL - Ang kinabuhi sa OFW didto sa gawas

Ang kinabuhi  sa mga  overseas  Filipino workers  (OFW) di lalim  ilabi na  kun  abtan  og  dimalas.

Sama sa nahimong isyu  karon  nga ang  buot  mopahimus sa  mga  babayeng  minyo ug daga  nga OFW, mga opisyal   ra usab  sa  embahadang  Filipinhon didto sa Saudi  Arabia.

Ang pipila  sa  maong  mga  babaye   nga  nagpaila,  kasagaran  nagpalaban  sa  mga  opisyal  sa embahadang  Filipino  tungod  kay  wa  sila’y  kadangpan  didto  nga  paryente.

Wa sila’y  kasumbongan  sa ilang  mga  problema, apan  may  mga  Filipina  nga  mabinantayon gihapon  sa ilang  dungog.

Bisan  minyo  sila  o  daga,  kaantigo  mobantay  sa ilang  kaugalingon  nga  di  mamansahan  sa  hugaw  nga  dugo  ni  bisan  kinsa  nga  di  nila  karelasyon  sa gugma.

Busa may  mga  babaye  nga  misumbong  ngadto  sa Malacañang   sa  nahitabo  kanila  didto  sa gawas, sama  sa pipila  nga   buot  mopauli  nganhi  sa nasud o magpa-repatriate  gumikan  kay wa  sila’y kuwarta,   nagpalaban  sa embahadang  Filipino  didto  sa Saudi  Arabia.

Ang  usa miingon  nga  usa  ka opisyal  sa embahada  mihangyo  kaniya  nga makighilawas, apan  iyang  gibalibaran  ug  gipasa  siya  ngadto  sa usa  ka  Egyptian.

Ang  maong  langyaw  kinsa  naluoy kaniya, maoy mipalit  og  tiket  sa eroplano  aron  siya  makapauli  nganhi  sa nasud.

Usa  siya  ka  minyo  nga  may  mga  anak  ug  iyang gihangyo  ang  kagamhanan  nga  unta  katabangan  ang  iyang  mga anak  nga  modagko  nga  may  tukmang  edukasyon.

Mahimong  pipila  ang maisugong  Filipina  mibarug  nga  maisugon  basta  di  lamang  mapildi  ang  ilang  pagkababaye  pinaagi  sa way  kapuslanan  nga  kalipay.

Alang  kanila  nga  bahala  na  kun  mapusgay  sila  basta  ipaagi  lang  sa mapuslanong  mga  hitabo.

Maoy  hinungdan  nga kun  maayo  pa lang  ang  kahimtang dinhi  sa  nasud, ilabi  na  sa natad  sa panginabuhi,  di  na  unta  tugotan  sa kagamhanan  nga mogawas  ang  mga  Filipino  aron  mangita  og  trabaho  sa laing  nasud.

Apan  gumikan  kay mao  kini  ang  atong  kapalaran,  mapugos  ang  tanan  sa pag-atubang sa debwenas  ug  dimalas  nga  kapalaran  aron lamang  mabuhi.