Tamang ehersisyo para sa lahat

AYON sa ginawang Philippine National Guidelines on Physical Activity ng DoH, WHO at UP, kapag lagi tayong nag-eehersisyo, mas gaganda ang lagay ng ating puso, baga, utak, bituka, buto, masel at buong katawan. Heto ang tamang pag-e-ehersisyo:

Para sa bata (5-12 years old):

• Maging aktibo ng 1 oras bawat araw. Maglakad, umakyat ng hagdan, maglinis sa bahay at magwalis ng bakuran.

• Puwede ang lahat ng ehersisyo tulad ng pagtakbo, pagtalon, patintero, tumbang preso, agawan, at iba pa.

Para sa teenagers (13-20 years old):

• Maging aktibo ng 1 oras bawat araw. Puwede gawin ang lahat ng ehersisyo kasama na ang mga sports tulad ng basketball, volleyball, swimming, gymnastics at iba pa.

• Sa ganitong edad, puwede na umpisahan ang muscle strengthening at flexibility exercises. Puwede mag-gym, gumamit ng weights at mag-stretching exercises.

Para sa adults (21-45 years old):

• Maging aktibo ng 30 minutos hanggang 1 oras bawat araw. Isama sa iyong aktibidad ang paggalaw habang nasa opisina o trabaho. Umakyat ng 1 o 2 hagdan.

• Ituloy ang pagpapalakas ng iyong masel. Mag-sports at magtrabaho sa bahay. Puwede rin ang pagsasayaw at jogging.

Para sa older adults (46-59 years old):

• Maging aktibo ng 30 minutos bawat araw. Pero maghinay-hinay na sa pag-eehersisyo. Bawasan o iwasan ang mga matitinding sports tulad ng basketball, football at pagtakbo. Ituloy pa rin ang pagpapalakas ng iyong masel.

• Kasabay nito, umpisahan na ang pag-alaga sa iyong balanse at coordination. Subukan ang yoga, tai-chi, pagsayaw at swimming.

Para sa young seniors (60-79 years old):

• Maging aktibo ng 30 minutos bawat araw. Ingatan ang iyong balance. Tumayo at maglakad sa bawat 1 oras na nakaupo. Puwede pa rin ang mga ibang ehersisyo pero bawasan na ang tagal at tindi nito. Maglakad imbes na mag-jogging.

• Maging maingat at ligtas sa iyong pag-eehersisyo.

Para sa may edad (80 years old pataas):

• Sa mga senior citizens at sa mga may sakit, itanong muna sa iyong doktor kung anong klaseng ehersisyo ang puwede sa iyo. Habang nag-eehersisyo, kapag ika’y nahilo, nasuka, nahapo o sumakit ang dibdib, itigil na ang eher-sisyo at magpahinga.

Tandaan: uminom nang sapat na tubig bago at habang nag-eehersisyo. Good luck.