Basura ug illegal nga estraktura nakatampo sa pagbaha

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini

Gihingusgan karon sa mga lokal nga kagamhanan ang paglimpiyo sa kasapaan ug mga kanal pinaagi sa pagtangtang sa mga illegal nga estraktura ug naghuot nga mga basura nga maoy nakatampo sa pagkabara sa pagdagayday sa tubig nga makaingon sa pag-awas sa tubig gikan sa mga kanal ug mga sapa nga  makamugna na hinuon og paglunop o  pagbaha.

Hinuon adunay mga nag-ingon nga ang gipangtukod nga mga illegal nga estraktura nga naglakip sa gipangtukod nga mga balay sa daplin sa mga sapa o mga kanal maoy mabasol ang mga opisyal sa kagamhanan nga nagpabaya lamang sa ilang katungdanan.

Matud pa nila ang mga balay nga gitukod sa daplin sa mga sapa o sa dagko mga kanal mahimo unta kining kapugngan ang ilang pagdagsang kun gihimo pa ang higpit nga pagbantay  sa ilang mga dapit nga nakasinati sa maong suliran sa katilingban.

Sa gipasiugdahan nga pagpanglimpiyo sa kasapaan ug mga kanal sa pipila maoy nadiskubrehan ang sinakong mga basura nga nakaali sa pagdagayday sa tubig nga maoy hinungdan nga ang mga opisyal sa kagamhanan ug mga molupyo nagtinabangay karon sa ilang pagpanghabwa.

Dugang pa nila nga ugaling lang kay dili man ikalimod nga ang maong mga molupyo nga nagpatukod og mga balay sa mga sapa o mga kanal gumikan usab kay nagamit man usab sila sa politikanhong kalihokan sa mga naglingkod nga mga opisyal sa kagamhanan.

Gitataw nila nga kini ang nag-unang hinungdan tungod kay kadaghanan kanila  mga nahimo man nga nagsuporta sa ilang kandidatura ug dako na kaayo ang kahigayonan nga mahimo kining suliran kun lain na usab ang opisyal nga mo-asumer sa iyang katungdanan.

Nagkinahanglan na kini og sabot-sabot alang sa relocation site nga ilang kabalhinan nga kun dili magkasinabot makahatag gayod kini og kalangan sa gitinguha nilang pagpanglimpiyo sa kasapaan ug mga kanal sa nagkadaiyang dapit sa dakbayan.