Ang good news ug bad news

Nailhan ug nadakpan na sa kapolisan ang usa sa mga suspetsado nga mibogbog, mikulata ug mipatay ni PO2 Gerlito Estremos. Ang nadakpan giila nga si Ian Canseco nga taga Barangay Sambag 2 ning dakbayan sa Sugbo.

Si Canseco nailhan sa kapolisan tungod sa iyang dagway nga bantang kaayong nakita sa CCTV nga gimontar sa dapit nahitaboan sa krimin. Ang suspetsado gidakop pinasikad sa Warrant of Arrest nga gipagawas ni Judge Samuel Malazarte sa Regional Trial Court Branch 15 kaniadtong Marso 19, 2013. Si Canseco gidakop dili tungod sa kasong pagpatay kang PO2 Estremos kun dili tungod sa kasong pagpayuhot og ginadiling drugas.

Maayong balita ang pagkasikop sa suspetsado nga si Canseco, ang dili maayong balita kay buhi pa siya ug ang iyang kauban sa paghimo sa krimin gawasnon pa.

Ang suspetsadong si Ian Canseco nag-atubang diay og kasong may kalambigitan sa ginadiling drugas ug may warrant of arrest nang gipagawas batok kaniya ang hukmanan apan wala siya dakpa ug gitugotan nga maglaroylaroy maong napun-an pa ang iyang nahimong salaud.

Kun wala makapatay og polis dili mahibaw-an nga may nakatago diay nga warrant of arrest batok kang Canseco. Kun gidakop pa unta dayon si Canseco dihang napagawas ang arrest warrant batok kaniya dili unta siya makahimo og laing salaud ug buhi pa unta karon si PO2 Gerlito Estremos.

Si Canseco bisan sa warrant of arrest nga napagawas batok kaniya yano ra gihapon siyang nagsuroy-suroy sa kadalanan sa dakbayan nga mura lang og walay kasong giatubang maong yano ra usab kaniya ang pagpangulata ug pagpatay sa polis nga igo lang naghimo sa iyang trabaho. Mao ni ang Bad news sa kaso ni Estremos.