Padayon ang hagit sa kapolisan

Duha ka mga tigpatuman sa balaud ang gipangpatay samtang nagtuman sa ilang mga trabaho. Dili usab layo ang gintang sa adlaw sa pagpatay kanila. Ang usa sa gipatay sakop sa CITOM. Gipatay siya samtang nagmando sa trapiko sa Barangay Banilad samtang ang laing gipatay police nga nadistino sa Police Station 2 sa dakbayan sa Sugbo. Ang polis gipatay samtang nagpatrolya sa may dalan P. Del Rosario dakbayan sa Sugbo sa alas dos sa kaadlawon.

Ang polis gipatay sa nagmotorsiklo nga iyang gisita tungod kay wala magsul-ob og helmet. Ang kriminal ina kay mosumitir sa iyang kaugalingon nakigsinukmagay hinoon sa polis, nangilog og armas ug namusil. Gawas nga namusil, gikawat pa gayod sa kriminal ang helmet sa polis ug dayong biya human himoa ang krimin.

Ang pagpatay sa polis ug traffic enforcer dakong hagit sa liderato sa mga tigpatuman sa balaud nga lutoson ug taralon sa hukmanan ang mga naghimo sa krimin kana kun dili sila gusto nga maoy sunod nga bilaran o lamayan.

Ang nahitabo sa duha ka tigpatuman sa balaud usa ka dakong kamatuoran sa pagka wala nay respito sa mga tawo sa atong balaud o bisan ngadto sa ilang isigkatawo busa kinahanglan gayod silang tinud-on ug kun gikinahanglan tudason.

Ang kapakyas sa liderato sa mga tigpatuman sa balaud sa paglutos ug pagtaral sa wala pa mailhi nga kriminal nga mipatay sa polis mao ang makapadasig unya pagmaayo sa mga kriminal ug utok sa paghimo og paghimo pa og krimin.    

Sa laing bahin, lisod ba ugod ang pagtuman sa balaud nga gikinahanglan pa man nga makiglalis ug mopatay?