Type O(utside) city hall na karon

Gisugdan na karon sa Department of Education (DepEd) ang K to 12 program.

Kining K to 12 usa ka progama nga nag-apil sa kindergarten + 12 ka tuig sa basic education (6 ka tuig sa primary, 4 ka tuig sa junior high school ug 2 ka tuig sa senior high school).

Kining maong programa gipatuman niadto pa sa Estados Unidos, Canada, Turkey ug ubang kanasuran.

Samtang maayo ang tumong ug tuyo sa atong gobiyerno sa pagpatuman niining 13 ka tuig nga educational program apan nakahatag kini'g dugang suliran sa DepEd.

Mas mosamot ang kakuwang sa atong mga magtutudlo, lawak-saringan, mga lingkoranan ug lamesa.

Labaw sa tanan, makahatag kini'g dugang suliran sa mga ginikanan nga naglisud na gani sa pagpatungha sa ilang mga anak sa wala pa ipatuman ang K to 12.

* * *

Katungod ug trabaho ni Mayor Mike Rama ang pagpadagan sa Cebu City hall subay sa maayong dalan.

Kining pag-renew o dili sa kontrata sa mga casual employees sa Cebu City katungod sa nangagamhanan sa city hall.

Apan kining panghudlat ni Bise Mayor Joy Young ug sa ubang mga tawo nga dili kuno tawhanon kining pagtangtang sa mga casual mora’g layo ra sa tinuod.

Natural alang sa usa ka employer, public ug private, sa paghashas sa record sa iyang mga casual nga empleyado kalabut sa ilang binuhatan.

Sumala ni Mayor Rama nga iyang gipasidan-an ang mga empleyado sa city hall, sa wala pa ang piniliay, nga bisan kun si kinsa ang ilang botohan basta di lang sila mokampanya sa ilang kandidato kay nakasupak kini sa balaud.

Apan daghan gihapon kanila, apil na ang ubang mga department heads, ang way kukahadlok nga nikampanya alang sa Type O.

Unya sala ba ni Mayor Rama kun iyang tangtangon ang mga empleyado nga nisupak sa iyang pahimangno? Iya man usab nga ibilin kun maayo ang binuhatan sa usa ka impleyado bisan kun sakop kini sa Bando Osmeña - Pundok Kauswagan (BOPK). Tangtangon usab bisan ang mga nagpaluyo sa Team Rama kun wala kini magtinarong sa ilang trabaho.

Unsa may buot ipasabut sa mga Type O magpabilin lang gihapon sila sa city hall bisan kun sila nagpabadlong? Karon Type O (utside) na sila sa city hall.

Si Mayor Rama miklaro nga anaa siyay evaluation team nga naghashas sa tanang mga empleyado sa city hall, labi na sa mga casual.

Mas maayo tingali nga ato na lang itugyan ngadto sa mayor ang pagpili sa iyang mga empleyado. Siya ra man usab ang basulon kun dili siya magmalampuson sa iyang administrasyon.

* * *

Tinuod ba nga napildi si Kong. Tomas Osmeña og 457 botos sa Bgy. Guadalupe diin siya nagpuyo? Ako man gud kining nabasa sa usa ka pamantalaan.

Ang maong sinulat naghisgut pa nga napildi si Kong. Tom sa iyang kaugalingong presinto! Tingali'g nakapanghuwam ko'g bakak apan akong gipasusi sa akong alalay ang official result niini sa buhatan sa Commission on Elections (Comelec).

* * *

Congratulations kang Francisco Ashley Lerios Acedillo, nga usa ka Sugbuanon, nga usa na ka kongresista karon. Siya ang ikaduhang nominee sa Magdalo Party-list. Ang unang nominee mao si kanhi Marine Capt. Gary Alejano.

Nalipay ug mapasigarbohon ako nga akong higala kini si Congressman Acedillo kay siya ug ang iyang grupo (Magdalo) misakripisyo sa ilang kinabuhi ug kaugmaon alang sa ilang mga kauban sa militar, in particular ug sa nasud, in general. Labaw nga nalipay si Madam Lorenza Ford nga dako’g natabang kang Sen. Antonio Trillanes ug sa Magdalo partylist.

Congrats Sen. Trillanes, Cong. Acedillo and Magdalo!

Email: [email protected]