Calamity fund
Bisan wala pa hingpit ideklarar sa Pagasa ang pagsugod sa ting-uwan apan ato na’ng nasinati ang pagbunok sa uwan matag karon ug unya.
Tungod niini di sab kalikayan ang mga pagbaha sa mosunod nga mga adlaw labi pa nga dili ingon niana ka maayo ang atong drainage system. Gawas sa mga pagbaha dili sab ikasalikway ang posibilidad nga duna sab unya’y mga landslide labi pa sa mga bukirang barangay nga giilang landslide prone area.
Ang Pagasa una na nga mipasidaan nga nagpaabot sila og duha ngadto sa tulo ka bagyo nga posibling mosulod sa Pilipinas niining buwana. Manghinaut lang ta nga kun mahitabo ang pangagpas sa Pagasa dili malakip ang dakbayan sa Sugbo.
Gawas sa mga katalagman nga sagad dala sa mga pag-uwan, dili sab kalikayan ang ubang matang sa kalamidad sama sa sunog. Aron pagtubag sa mga panginahanglan sa emergency, ang matag government unit gimanduan ubos sa Republic Act No. 10121 o ang Philippine Disaster Risk Reduction and Management Act of 2010 paggahin og calamity fund nga katumbas sa singko porsiento sa annual budget niini.
Pinasubay sa maong labaud gipagawas ni kanhi DILG secretary Jessie Robredo niadtong Abril 17, 2012 ang Memorandum Circular No. 2012-73 nga nagsitar sa guidelines unsaon paggamit ang pundo.
Basi sa lagda 70 porsiento sa calamity fund mamahimong gamiton pagpamalit og mga ekipo sama sa mga early warning devices aron pagpaminus sa epekto sa kalamidad.
Diha sa guidelines gi-enumerate ang mga ekipo nga mamahimong paliton ug wala malakip sa mga ekipo nga gi-enumerate sa guidelines sa DILG ang security camera sama sa gipamalit sa dakbayan sa Sugbo nga didto kuhaa ang pundo sa P202 milyones nga calamity fund karong tuiga.
Ang konseho sa dakbayan mi-question sa pagpalit sa dakbayan og mga security camera nga mokantidad og P15 milyones tungod kay wala ni moagi og approval sa konseho.
Nabalaka ko nga magkuwang na hinuon sa gikinahanglang pundo ang dakbayan sa higayon nga dunay katalagman tungod kay atong gigamit ang kwarta sa pagpamalit og mga security camera.
Samtang uyon ko nga mobutang og mga security camera ang dakbayan sa atong kadalanan, apan kinahanglan ba gyud nga adto kuhaa ang pundo sa calamity fund?
Dili ba mamahimong adto kuhaon ang budget niini sa laing item sa annual budget gawas sa calamity fund? Mas labaw’ng gikinahanglan ang kwarta sa disaster preparedmess. Alang nako dili kabahin sa disaster preparation ang pagpamalit og camera.
Mas haum ni alang sa crime prevention busa ang budget angayang adto kuhaon sa peace and order.
* * *
- Latest
