Minglanilla Youth Forum

Mapupos ang suspension period ni suspended Gov. Gwendolyn Garcia karong Hunyo 19.

Obligado ba siya nga mo-report sa trabaho nianang adlawa? Siyempre, kay kun dili siya mo-report, mahimo siyang kasohan og abandonment sa iyang puwesto.  Apan ang nindot nga pangutana: kinahanglan ba gyud siyang mobalik sa Office of the Governor aron manghilabot sa tunhay na karon nga pamalakad sa Kapitolyo?

Adunay mga estorya nga mobalik gyud si Gwendolyn Garcia aron paglimpyo sa iyang kaugalingon sa mga pasangil nga gibato kaniya samtang suspendido siya sa pagka-gobernador, sama pananglit sa milyones ka utang sa Kapitolyo nga wala mabayri sa pamunoan niya ug malisod nang mabayaran kay wala nay pundo. Kini, bisan sa iyang panghambog sa iyang State of the Province Address niadtong miaging tuig nga bilyones ang kuwarta sa probinsiya.

Nagtuo hinuon ko nga dili kini buhaton sa suspendidong gobernadora. Nagtuo ko nga aduna pay kaulaw ug tanlag nga nahibilin si Garcia nga motuis sa matuod nga sitwasyon sa Kapitolyo.

Kun apason lang ni Garcia ang media mileage sa iyang pagbalik, mosamot siya og kabati sa mata sa publiko, ang samang publiko nga milubong taga-liog sa iyang igsuong si Pablo John Garcia niadtong Mayo 13 nga eleksiyon.

Kagahapon, migawas sa balita sa The Freeman nga si acting Gobernador Agnes Magpale midesisyon nga adto mo-turnover sa pagdumala sa probinsiya ngadto kang Governor-elect Junjun Davide, kay kang Gwendolyn Garcia nga aduna pay nahibiling 11 ka adlaw sa dili pa mapupos iyang termino karong Hunyo 30.

Maayong suportahan kining maong desisyon sa ngalan sa tunhay nga pagpadagan sa kagamhanan sa lalawigan sa Sugbo.

Ang tuyo nga adto na lang i-turnover kang Junjun Davide ang pamunoan sa Kapitolyo aron dili maputol ang momentum tungod lang sa laksot nga pamolitika.

* * *

Ang mga lider sa kalamboan sa Minglanilla nga naggikan sa nagkalainlaing sektor nagkatigum niadtong miaging gabii ug gihisgotan ang pag-institutionalize sa youth development program sa lungsod.

Ang tigom nga gihimo sa residensiya ni Rotary Club of Cebu Minglanilla President Lumen Cañedo gitambongan mismo ni Vice Mayor-elect Jojo Selma, RCCM Pres-elect Jigger Cañedo, Immaculate Heart of Mary Shrine team moderator Fr. Jojo Deligero, parish facilitator Vilma Laranas, youth leader Ivy Cañedo ug uban pang mga nagpakabanang indibidwal.

Nindot ang nahisgotang mga plano nga misangko sa kahimoan sa Minglanilla Youth Forum nga gi-schedule karong Hunyo 29, adlaw’ng Sabado, diin tigumon ang mga batan-on sa lungsod paghisgot alang sa ilang kalamboan.

Gihisgotan usab sa tigum ang nagkalainlaing mga kalihukan tumong ang pagpalambo sa kabatan-onan sa Minglanilla.