Walay kapuslanan

Ang tukma nga himoon ni Mayor Michael Rama mao nga taktakon kining mga ligoy nga kawani sa City Hall ug dili na hulipan ang ilang mga lingkoranan gawas kun masuta nga ang ilang katungdanan gikinahanglan gayud.

Dili man siya makasakop sa mga ligoy kay layo pa gani siya abtik man kaayo ang maong mga kawani nga mongisi ug moabiba kaniya. Kun isalig usab nimo sa mga department heads, ayaw na lang kay ila ra kini nga panalipdan.

Hapit kada adlaw gikan sa Lunes ngadto sa Biyernes anaa ko sa City Hall ug wala malilong kanako nga daghang mga empleyado nga inigsulod nako sa mga opisina walay mga trabaho.

Ang uban nag-irag-irag lang sa ilang lingkoranan, adunay uban nga naghugdong sa lamesa, ang uban nagsigi lang og sultihanay sa kaubang kawani, ang uban nagsuroy-suroy.

Kini maoy sagad nga mga talan-awon diha sa ubay-ubay nga mga kawani sa City Hall. Kining ako dili kay pagdaut sa mga hingtungdan, apan agi kini og pagpukaw sa inyong kakuwangan.

Nakalimot na man gud tingali kining maong mga kawani nga giswelduhan sila gikan sa kwarta sa kagamhanan nga buhis sa katawhan. Kadto hinoong mga kawani nga taktakon kay “tua makapusta sa pikas” aw ingon ana man gayud ang politika.

* * *

Usa ka construction nga gitukod dili halayo sa Marco Polo Plaza Hotel nga gitukod nga wala’y permit nagpadayon gihapon. Gipatawag na ang tag-iya niini sa City Hall apan nagpadayon gihapon ang trabaho.

Mora’g matan-aw nimo nga walay ngipon ang kagamhanan kay wala makasanta niini samtang dili pa makompleto ang ilang dukomento. Mao kini ang usa sa rason nga hinay ang koleksyon sa buhis sa atong dakbayan.

Atensyon “my friend” Engr. Kenneth Enriquez paspasi ninyo sa paghimo’g aksyon kining maong isyu. Unya, angay tingali nga si Mayor Rama mogamit og mga abtik gayud nga kawani apan dili kurakut sa paghimo’g inspection sa mga nagpadayon nga construction.

* * *

Pwerteng dagkoa na gayud sa bayranan sa tunghaan diha sa mga private schools.

Sayonan ka nga sa CIT University mora’g P30,000 kapin na ang tuition fee sa Architecture nga maoy gikuha sa akong anak. Unsaon nga sa miaging tuig giaprobahan man ang siete porsiyento nga increase sa ilang tuition fees.

Ingon usab niini sa ubang mga tunghaan. Maayo na lang gani kay si Atty. Augusto W. Go sa University of Cebu (UC) mitanyag nga kadtong mga “Cebu City scholars” pabayron na lang og P2,000 ang semester.

Ayaw ‘sab tawon mo’g palabi uy mga tagdumala og tunghaan.