Kapamilya Run sa CICC

Cebu International Convention Center, Mandaue City—Sa labing unang higayon, anhi magsugod ug matapos ang Kapamilya Run, ang tinuig nga lumba sa dagan nga gipasiugdahan sa DYAB 1512 khz. Kaliboan ka runners gikan sa Sugbo ug kasilinganang mga lalawigan ang magtapok dinhi sugod sa alas-4 sa kadlawon karong Hunyo 16, adlaw’ng Domingo, di lang aron pag-apil sa lumba ug pag-ehersisyo kon dili, ug labi na, aron pagtabang sa labing kabos nga mga eskuylahang publiko.

Among natigom nga pundo sa Kapamilya Run ug Kapamilya Relief Campaigns sa niaging tuig maoy gigamit sa pagtukod sa walo ka classrooms sa upat ka bahin sa Negros Oriental nga maoy labing naggusbat sa linog sa niaging tuig.

* * *

Samtang magpaabot sa pagkahuman og tukod sa school buildings duha ka buwan gikan karon, padayon na ming nagsusi sa nag-unang mga panginahanglan sa labing kabos nga mga eskuylahang publiko sa Sugbo ug sa rehiyon. Inig tak-op sa rehistrasyon sa Kapamilya Run karong Hunyo 15, bisperas sa lumba, mahibaw-an na namo unsay mga panginahanglan nga among matubag.

Paningkamotan namo nga maapud-apod dayon ang mga hinabang samtang mao pay pagsugod sa klase. Agad sa gidaghanon, gilay-on ug mga panginahanglan sa mapilian nga mga eskuylahan, hingpiton namong pagtunol sa tanang hinabang sa semana sa Hunyo 28, ang ika-25 nga anibersaryo sa pagsibya sa ABS-CBN Cebu.

* * *

Technical Director sa Kapamilya Run, si Joel Baring sa Sports and Fitness Enthusiasts (SAFE), nakahingpit na sa ruta latas sa labing dagkong kadalanan sa Mandaue City sa upat ka kategoriya sa lumba: 25 ka kilometro ang labing taas (pahaom sa Silverasyon sa ABS-CBN Cebu); sunod ang 15 ka kilometro; dayon ang pito ka kilometro; ug ang fun run nga tulo ka kilometro. Magpasalamat ming Mandaue City Mayor Jonas Cortes sa pagtugot na sab sa DYAB ug ABS-CBN pagpahigayon sa tinuig nga lumba sa kadalanan sa Mandaue. Pasalamat sab mi sa Traffic Enforcement Agency of Mandaue (Team) ug Mandaue City Police Office sa ilang pagtabang nga mapahapsay ang umaabot nga lumba.

* * *

Labing dakong pasalamat ngadto ni Cebu Acting Governor Agnes Magpale nga, bisan sa talagsaong mga sirkumstansiya sa iyang pagbanos pagduma sa Kapitolyo, wa magmakuli pagpagamit sa CICC alang sa Kapamilya Run. Mahimo ra gyud unta siyang mobalibad kay may mas dinalian nga mga kontrobersiya nga angay’ng unahon niya pag-atiman. Sa way paghisgot sa way kinutoban nga mga kontrobersiya sa CICC mismo. Himuong Kapamilya Run tulo ka adlaw sa di pa mapupos ang pagduma ni Magpale sa Kapitolyo. Kana kun mahinayon ang pagbalik ni suspended governor Gwen Garcia karong Hunyo 19. Maong gawas sa lumba, pagpakiglumba sa kaugalingon ug pagtabang, motanyag ko og laing hinungdan pag-apil sa Kapamilya Run: Kahigayonan pagsuhid sa building nga gigastohan og P1 bilyon sa buhis sa mga Sugbuanon.

* * *

Email: [email protected].