Panghinaot sa kasong Joavan

Sa makausa pa, nipasalig ang Visayas Ombudsman nga ilang tinud-on pag-imbestigar ang mga pasangil nga sakyanan sa Talisay City Hall ang gigamit ni Joavan Fernandez, ang kontrobersiyal nga anak ni Mayor Soc Fernandez, sa pagpuga gikan sa detention cell sa Talisay City Police Station. Matud ni Deputy Ombudsman Pelagio Apostol unahon nila ang kaso kay naglambigit og dakong opisyal sa gobyerno.

Pasayloa, apan wa kong kapugong sa akong kaugalingon sa pagpanghuy-ab ning gisaad nga imbestigasyon sa Ombudsman. Kay samang saad ang ilang giluwatan sa nangaging mga insidente sa pagpabadlong ni Joavan nga naglambigit sa mga sakyanan sa gobyerno nga nadestino gyod gani sa buhatan ni Mayor Fernandez. Ug nakatag-an ka way kasong nasapaka hangtod karon.

* * *

Matud ni Apostol mas lig-on ang sukaranan sa ilang imbestigasyon, bisan way pormal nga mga reklamo nga napasaka sa ilang buhatan, kay ang mga taho ug mga hulagway sa sakyanan sa gobyerno sa pagpuga sa gobyerno nga nakuha sa media ang ilang basehan. Apan gitaho sab sa media ang nangaging mga pabadlong ni Joavan ginamit ang opisyal nga mga sakyanan sa iyang amahan. Nakasabot kong nagkinahanglan og mga ebidensiya ang Ombudsman sa ilang mga imbestigasyon. Nahibawo sab hinuon kong way mahitabo kun si Apostol magyaka lang sa iyang buhatan ug magpaabot nga lawogan og mga dokumento. Nga kun gamiton lang ang gahom sa Ombudsman sayon ra unta nilang makuha.

* * *

Hinaot nga sa kataposan nakaamgo na si Apostol nga ang iyang mga pagarpar ug pasidaan di paigo sa pagbadlong sa way kinutoban nga mga abuso ni Joavan ug sa mga opisyal ug mga buhatan sa gobyerno nga nagdupadupa niya.

Hinaot nga tinud-on na gyud pagsusi unsay mga kaso nga mahimong ikapasaka sa labing daling panahon batok nilang Mayor Fernandez ug ubang mga opisyal sa Talisay nga nangiyugpos lang sa pagpanghasi ni Joavan sa inosenteng mga molupyo sa dakbayan sud na ron sa daghang katuigan.

* * *

Hinaot sab nga mangisog nang kapolisan. Nga sud sa dugay nang panahon klarong nagkinto sa ilang pagpatubag ni Joavan sa iyang mga binuhatan. Hinaot nga makaamgo nang kapolisan nga ang ilang tahas pagpahamtang sa balaod bisan kinsay maig-an ug masakitan mas mahinungdanon kay sa allowances ug ubang mga pabor nga ilang madawat gikan sa lokal nga mga opisyal.

Hinaot nga hingpit nang tapuson ang kultura sa pagpahabol sa balaod sa matag higayon nga mga gamhanan ug mga adunahan ang makahimo og kalapasan.

Hinaot nga ang sangpotanan sa niaging piniliay sa Mayo 13 makapahinumdom di lang sa Ombudsman ug sa kapolisan kun dili sa tanang hingtungdan nga ang yanong katawhan nga maoy kinabag-an ug di ang mga politiko ug kasamtangan nga mga tagduma sa gobyerno ang tinuod nga hawod.

* * *

Email: [email protected]