Magnanimous in victory

Usa kanhi namong foreign visitor mikomentaryo nga usa kono sa depekto natong mga Pilipino … kining atong pagkadinumtanon. Matud niya, dinhi sa atong nasud, tapus sa eleksyon, ang bag-ong napili nga mga kandidato, ma-local o nasyonal, una nilang buhaton mao ang paghimo’g bag-ong mga plano for implementation sulod sa ilang administrasyon.

Kuli kaayo kitang makadungog nga ilang padayunon ang mga plano ug mga proyekto sa mga nangapilde … sa ato pa, dugang gasto kay magsugod na man pud sa sinugdanan, bisan kun maayo unta ang mga gisugdan na nga mga proyekto sa napilde.

Mao ni ang nahitabo ni Marcos, una natong gibuhat, tapus nato siya mapalagpot, mao ang pagpahunong sa tanan niyang gibuhat, lakip na sa mga maayo nga proyekto – ug ang nakaparat kay wala kitay gipuli nga mas maayo. Misugod kita sa sinugdanan, nga unta mahimo man nga atong gipadayon ang mga maayo niyang mga plano ug mga proyekto.

Mao nga mikomentaryo ang bisita namong langyaw nga sa ila kono, sa Amerika, walay labut sa pagkapilde ug pagkataktak ang mga plans and projects sa naparot nga presidential candidate.

Dinhi sa ato, usa sa mga maayong proyekto ni Tingting, mao unta ang students’ dormitory, apan waa padayona sa mipuli kaniya, kaylagi, ilang gidumtan si Tingting.

Dili kita magnanimous in victory. In most instances, atong gamiton ang atong kadaugan pagpanimalos. What a typical Filipino politician! Sa nangampanya pa, maayo kaayo tang tawo, humble ug mapasayluon. Inigkadaug, mokalit kita’g ka-hambugero ug kamadinumtanon.

Hinaut nga dili kini maoy mahitabo sa mga nakadaug sa miaging eleksyon. In fact, ilang  paningkamotan nga magkahiusa kitang tanan. Amigo tang tanan.

Katingalahan ug wala palandunga ang nanghitabo sa miaging eleksyon. Walay nagdahom nga mapukan ang mga dagkung haligi sa politika. Sa ato pa, mao nay mipatigbabaw ang kabubut-on sa lungsod. Mao nay mi-prevail ang tinguha sa Haring Lungsod.

Kun duna may pinalitay, wala na kini makaugpo tungod kay maoy mipatigbabaw ang kabubut-on ug tingog sa lungsod. Sa ato pa, gipanalipdan na sa lungsod ang balaan nga katungod pagpili.

Somewhere, mao usab kini ang nahitabo sa ubang mga dapit sa nasud, diin nag-anam nag kahugno ang gamhanang mga political dynasties. Ug nag-anam nag kakusog ang tingog sa lungsod.

Sa sunod nga mga eleksyon, maoy atong mapaabot nga ang atong mga political leaders magsugod nag paminaw sa tingog sa katawhan. Magsugod na sila pagkaamgo sa pagkatinuod sa pagka-Hari sa Lungsod. Nga kita, lungsod, maoy magbuot kinsa ang atong palingkuron sa panggobiyerno … dil sila.

Sa unang mga panahon, sila ang magbuot kinsa ang pilion, apan, karon, kita na lungsod ang magbuot. Ug mao kini ang nahitabo sa miaging eleksyon. Ato kining padayonon. Ug kining atong pagka-hari, ato usab padayunon, even after the elections.

Congratulations sa mga nakadaug … and please be magnanimous … and be careful sa mga tawo nga nag-alirong kaninyo, ang uban kanila tingalig mga sipsip ug mga buaya … kay tingalig sila ra pud unya ang maka-cause sa inyong downfall.