EDITORYAL - Ang pagdawat ug pag-angkon sa kapildihan

Dalaygon  kaayo  ang  mga  kandidato  kinsa  dali kaayong  miangkon  sa  ilang  kapildihan  sa election  niadtong  Lunes.

Kini  ang matang  sa  mga  politiko  nga  nagpakita  sa ilang  kaligdong  kay  nagpasabot  sila  sa ilang  dakong pagsalig   sa katakus    sa  sistema  sa pag-inihapay  sa  mga  balota  human  sa piniliay.

Dinhi  sa Pilipinas  tagsa  ra kaayo  ang  mga  politiko    nga  modawat  sa kaparotan  nga  luag  sa dughan.

Mao  kini  mga  politiko  nga  di gusto  og  gubot  kay  ang iyang  tuyo  mao  nga  mopadayon  siya  sa pagbulig  sa  nakapildi  kaniya aron  nga  bisan  wa  na  siya  sa poder  may  ikatampo  gihapon  siya  sa pagpauswag   sa  mga  serbisyo  sa goberno  nga   gikinahanglan  sa katawhan.

Ang  maong  kinaiya  maoy  sekreto  sa  mga  batid, hanas  ug beterano  nga  mga  politiko  kinsa  nag-apas  nga  pinaagi  sa pagkamapainubsanon   labing  modayeg  kaniya  ang  katawhan.

Human  sa  pila  ka tuig  nga pagserbisyo  sa mopuli  kaniya, unya  di  hiuyonan  sa katawhan,  ang  mga  nakatilaw  sa iyang  kaayo  mahimong  maoy motugpo  kaniya  pag-usab    paglansar  sa  laing  higayon  aron  padayon  nga  matagamtaman  ang  iyang  maayong  serbisyo.

  Ilabi  na  kun  wa  siya  makabuhat  og  anomaliya    sa  panahon  sa iyang    pangatungdanan  siya  ang  pangitaon  sa katawhan.

Ang  iyang  kaligdong  di  makalimtan  sa katawhan  ilabi  na  kun  siya   nakahatag  og  dili na  maihap  nga  kaayohan  ngadto  sa lapad    nga  hut-ong  sa  katilingban.

Mapildi  man  siya  sa boto  apan  ang  iyang  ngalan  nga  may  kredibilidad  ug  prestihiyo  magpabilin  sa galamhan  sa publiko.

Hinuon  di kalikayan  nga  may  mga  politiko  usab  nga  gumikan  sa ka-diskontento  sa   iyang  kapildihan mangita  og  boruka   sa katahap  nga  gitikasan  siya  sa iyang  kaatbang.

Apan  usahay  may  mga  tawong  samokan  sa iyang  kareklamador  busa  kun  magpapili  kini  pag-usab  mosamot  na  gayud   pagtiurok  sa kapildihan  ilabi  na  kun  wa siya  makapakita  og maayong  serbisyo  ngadto  sa  mga  pumipili.

 Ang  tarong  nga  politiko  dali kaayong  mosagop  sa kinaiya  sa  mga  Amerikano  kansang  baroganan  mao  ang  pagtunol  sa  iyang  respeto  uban  ang  paglamano  ngadto  sa mopuli  kaniya  pagpasabot  nga  gitahud niya  ang  hukom  sa katawhan   ug  siya mao  ang  de prinsipyo  nga  politiko.