Hagit sa mga midaug

Ang eleksyon dinhi sa Sugbo kaniadtong Lunes makakulit og kasaysayan sa sugilanon sa politika nga mahimong dili makalimtan sa mga Sugboanon.

Kini pa ang una nga higayon nga napilde sa eleksyon si Kongresista Tomas R. Osmeña nga anak ni Senador Serging Osmeña ug apo ni kanhi Presidente Sergio Osmeña Sr.

Kun si Mayor Michael Rama pa ang napilde, pareho usab nga unang higayon nga siya mapilde, apan giswerte lang nga siya mao ang midaug batok ni Osmeña.

Halos dili gayud ko makatoo sa resulta sa eleksyon nga nangapilde ang mga lig-on nga kandidato sama ni Kongresista Eddie Gullas pagka mayor sa Talisay City.

Kinsa gud tawon ang magtoo nga mapilde si Gullas nga usa sa mga beterano nga politiko nga nagmugna sa balaud nga nakapahimo nga dakbayan sa Talisay.

Apil si Congressman Pablo Garcia napilde pagka kongresista sa Cebu City’s 2nd district, unya ang iyang anak nga si Kongresista Pablo John Garcia wala usab makadaug pagka gobernador.

Si suspendido’ng Governor Gwendolyn Garcia diriyot pa gani malakip sa pagka pilde. Buyno, huwata na lang usab ninyo ang laing eleksyon tulo ka tuig gikan karon.

* * *

Giswerte si kanhi Senador Sonny Osmeña no kay nakadaug batok sa iyang kontra pagka mayor sa Toledo. Wala tingali sila makahibalo nga estrikto kaayo kini nga pagkatawo.

Pastilan, sa una lang giinterview si Sonny sa DYLA gihapak niya ang microphone ug natagak. Mao nga magpanagana ko nga mointerview ani’ng Sonny Osmeña.

* * *

Alang ni Reelected Mayor Michael Rama, na hala trabahoa na lang palihug ang angay nga buhatonon aron molambo ang atong dakbayan sa Sugbo.

Ang usa sa nakatabang sa kandidatura ni Mayor Rama mao ang pagpang-aspalto sa mga karsada dinhi sa dakbayan nga gihimo sa Department of Public Works and Highways (DPWH).

Sinaw na g’yud tinuod ang daghang mga karsada dinhi sa dakbayan ug inigkakita sa mga tawo niini, magtoo man gayud nga ang mayor maoy nagmugna sa mga proyekto.

Atong awhagon si Mayor Rama nga himoon kini nga sumbanan ug usa kini sa proyekto nga angay’ng hingusgan sa iyang administrasyon.

Mayor Mike, hawani palihug ang dalan Legaspi duol sa barangay hall sa Santo Niño ug aspaltoha kay pwerteng batia sa maong karsada nga agianan man gayud unta kana sa daghang mga sakyanan. Akong paabuton nga hawanan nimo ang maong dapit mayor Mike ug hapsaya ang maong sidewalk nga gisaway sa daghang mga tawo.