Pagkapukan sa halangdon

Ang uban nalimot ngano kanunay siyang gihangad sa isig katawo. Respetado ug gitamod tungod sa hilabihang kataas na sa iyang nahimutangan nga nahimong halangdon sa katawhan. Kita nga nia  sa ubos usahay batiog kasina, kay igo ra man nga moila sa tawong may katakos o katungod aron kita iyang serbisyohan.

Ang pagkahalangdon, hinatag kana sa kahitas-an isip bunga sa atong mga paningkamot. Kitang tanan dato o kabos man gihatagan og higayon niini,  apan wa lang gayud kita kapasar sa mga pagsulay. Kay di lalim ang pag-antos nga gipuhonan. Nga tungod sa kahabog sa gahom, nitikig nga dili na kakita sa ubos.

Kun ikaw halangdon angay mo kanang ampingan. Koronang bulawan kana nga gipatong kanimo nga maisip nga labaw pas bahandi. May adlaw nga huboan ka niani, kun di mo matugkad ang iyang kabilihon. Mawad-an kini’g kilatis tungod kay nataptan sa kahugawan. Nga ang buhat mao ang pahimulos sa kaugalingon.

Busa kun mahatagan kag higayon molingkod sa katarungan ug koronahan sa kahalangdon sa gitugang gahom, himoa ang hiyas sa gugma nga batonan ang kaangayan. Aron hugopan ka’g ipabilin nga palig-onon ang imong nahimutangan. Pasidunggan kang himoan og bantayog nga mahinumdoman sa mga kaliwatan.

Ayaw kahinugon nga di mo kini mahuptan sa dayon kay ang tanan may kinutuban man. Aron sad kahatagan ang uban nga mahisama kanimo. Apan ang imong maayong binuhatan maoy molungtad nga magpabilin ang ilang pagtahud kanimo. Kay gitudloan mo man usab sila nga mahimo nga ehemplo sa katarong.

Kini unta ang atong pangandoyon, usa ka kinamaayohang hiyas nga angay natong himuong kabilin sa atong panimalay. Nga puno sa gugma sa spirituhanon ug makitawhanon nga pagrespetohay ug pagsinabtanay ning hadla sa kinabuhi. May pailob ug mapainubsanon sa pagdawat sa mahimo nato nga kapalaran.

Nga bisan pa man kita uyamot sa katilingban, may ikapasigarbo gihapon kita nga katakos nga labaw pa sa kahalangdon nga mao ang kaaghop sa kasingkasing. Maantigong moaninaw nga andam isakripisyo ang kaugalingon aron lang makapamahin kutob sa atong kahimoan. Hiyas ning labaw pas bulawan

Kining tanan anaa na kanato, wa lang ugmara ug amomaha. Kay kulang sa pagtoo’g pagsalig sa Dios, nga kini gihimong batakang hiyas sa pagkatawo nga gipahaom sa kabalaanon sa magbubuhat, nga maoy naglatid sa atong kapalaran.