Pagkaswerte’ng Totol

Samtang nagkaduol na ang adlaw sa eleksyon, misiaw na pag-ayo ang lainlaing kahugpongan nga kunohay mosuporta sa masi’g ka kandidato. Tan-aw nako, pwede ra baya nga maghilum-hilum ang mga grupo ug dili na kinahanglan nga ipahibalo pa sa publiko kun kinsa ang ilang suportahan atul sa eleksyon.

Klaro man kaayo nga nagbawos-bawos na lang ang duha ka politikanhong kahugpongan dinhi sa dakbayan sa pagpadayag nga sila gisuportahan ‘sab sa pundok sa mga batan-on, pundok sa mga senior ug uban pa.

Maoy kuhai ninyo og basihanan ang mga respetado nga kahugpongan sa mga magpapatigayon sama sa Cebu Chamber of Commerce and Industry (CCCI), miendorso ba gud sila? Wala.

* * *

Pagka swerte ni Atty. Aristotle “Totol” Batuhan ug ni James Cuenco kay sila ra’ng duha ang giapil sa lista sa mga kandidato sa Team Rama nga gisuportahan sa Iglesia ni Cristo.

Sa tanang kandidato sa Bando Osmeña Pundok-Kauswagan (BOPK) sila ra si Konsehal Rodrigo Abellanosa ug Zenaida Amores ang wala suportahi sa Iglesia Ni Cristo.

Magkaatbang sila si Batuhan ug Abellanosa sa pagka kongresista sa south district ug ambot ngano kaha nga wala man suportahi sa Iglesia Ni Cristo si Abellanosa karong eleksyona.

Miingon ko nga swerte kaayo si Batuhan kay natan-aw sa Iglesia nga siya ang angayan nga suportahan kay kang Abellanosa. Kini ra ba’ng mga sakop sa Iglesia Ni Cristo motuman g’yud sa kamandoan sa ilang labaw.

Ubay-ubay ra ba g’yud ang mga sakop sa Iglesia Ni Cristo dinhi sa dakbayan sa Sugbo. Mao kini ang rason nga makaingon ko nga swerte ‘sab kaayo ang mga sakop sa BOPK nga gisuportahan sa Iglesia Ni Cristo.

* * *

Sa eleksyon karong Lunes, kulba-hinam gayud kaayo dinhi sa dakbayan sa Sugbo kay sa unang higayon dunay usa kanila ni Reelectionist Mayor Michael Rama ug ni Kongresista Tomas Osmeña nga mapilde. Sukad-sukad sa pagsulod nila sa politika silang duha si Osmeña ug Rama wala pa gayud makasinati og kapildehan, karon pa nga eleksyona nga dunay usa kanila nga mapilde. Mao kana nga abtik ug walay kapoy-kapoy sila nga nangampanya.

Ingon ana man gayud ang eleksyon, adunay mapilde ug aduna ‘say modaug. Sigurado gayud ko nga sakit kaayo alang sa mapilde kay sila’ng duha suod kaayo nga managhigala kaniadto.

* * *

Karong adlawa maoy katapusang kampanya alang sa mga kandidato basi sa balaud, apan anaa ra kini sa papel kay ang tinuod bisan gani ugma daghan gihapon ang mohimo’g kampanya.

Gitawag ni sa uban og “kinamangay” ilabi na sa bukid.