Pilay gidawat sa polis?
Kinsay motuo nga wa mabayri ang polis nga nagbantay sa sinagop ni Talisay City Mayor Socrates Fernandez? Kinsay motuo nga niiskapo si Joavan Fernandez ug wala tuyoa pagpaeskapo?
Kinsay motuo nga way kalibutan ang mayor sa pag-iskapo sa iyang sinagop? Kun basihan ang mga panghitabo sa wala pa ang giingon nga pag-iskapo ni Joavan way husto og paminsar nga motuo nga nakaiskapo si Joavan.
Hitsas sa tanang sukaranan ang pagtahap nga wala moiskapo si Joavan kun dili gituyo pagpaguwa sa polis nga nagbantay niini. Dili sab katuohan nga way kalibutan si Soc Fernandez sa pagkagiw sa iyang anak gikan sa prisohan.
Si Joavan gipagawas sa jailer nga si PO3 Leandro Azarcon gikan sa selda hapit na ang tunga’ng gabii niadtong Miyerkules. Ang hinungdan tungod kay buot ni nga makigkita sa iyang upat ka mga anak nga mibisita didto sa police station.
Pila may gidawat ni Azarcon aron iya ning himuon? Una lugar, nganong gitugotan ang pagdawat og bisita sa tunga’ng gabii. Ikaduha, kun gitugot man gani nga modawat kini og bisita, nganong gipagawas sa selda. Ikatulo, kun gipagawas man nganong wala bantayi ug yano ra nga mibiya si Joavan gikan sa presinto.
Tataw nga tinuyo ug gisabot nang daan ang polis nga nagbantay ni Joavan. Ambot unsay gipasalig kaniya. Hinaut nga igo ni nga itapak sa posibling income nga mahanaw niya kun mataktak siya sa serbisyo. Dili lang ang iyang kaugalingon maoy iyang gibutang sa piligro kun dili hasta ang iyang hepe nga si Supt. Elmer Lim. Kun ako’y Lim akong irekomendar nga taktakon sa serbisyo si Azarcon.
Di sab ko motuo nga wala masayod si Soc Fernandez tungod kay sigun sa mga saksi government vehicle maoy nikuha ni Joavan didto sa police station. Hinuon dili na ni bag-o tungod kay sa kadaghan nang kaso ni Joavan consistent man si Soc Fernandez sa iyang pagkakonsintidor. Gani mibahad man ni nga ikiha ang hepe sa kapolisan sa Talisay tungod kay mituo siya sa pahaba sa iyang badlongo’ng sinagop nga gidagmalan siya ug gitamnan og ebidensiya.
Kun tinuod man nga gidagmalan si Joavan, maayo gani kay wala ni ihawa sa kapolisan tungod sa kadako sa purhisyo nga nahimo niini sa katilingban.
* * *
Belated Happy Birthday sa akong higala nga si kanhi Undersecretary Paul Clarence Oaminal sa Dangerous Drugs Board. Natandog ko sa iyang status sa Facebook atol sa iyang adlaw’ng natawhan tungod sa nagpabiling kainit sa iyang tinguha nga masumpo ang problema sa drugas dinhi sa nasud labi pa sa Sugbo.
Bisan wala na siya sa pwesto apan wala mahanaw niya ang tinguha nga mapadayon ang kampanya batok sa drugas. Bilib ug saludo ko sa didikasyon ni Atty. Paul Oaminal. Husto kaayo si Atty. Paul nga karong Lunes, adlaw sa eleksiyon, angayang tan-awon sa katawhan ang kandidato nga ilang pilion. Kadtong kandidato nga dili higala sa mga durugista. Kadtong kandidato nga ang pamilya limpiyo ug way lama sa bisan unsang pasangil nga nalambigit sa negosyo sa drugas.
Sama sa usa ka pilionon pagkakongresista dinhi sa dakbayan nga duha sa iyang mga igsuon gidungog nga negosyante og drugas.
* * *
- Latest
