Kopras batok vote buying

Dinasig sa kanta ni Johnny Kawa nga “Ko-Ko-Koprasa,” among gipangutana ang mga tigpaminaw sa Arangkada sa DYAB 1512 unsay ilang ikasugyot nga sulbad sa vote buying. Kasagaran nila nidason sa awhag nga dawaton ang suburno sa mga politiko apan botaran gihapon ang gituohan nga labing takos ug labing ligdong sa mga magpapili karong Mayo 13.

Matud nila way kontrata ni obligasyon nga namugna kun dawaton ang kuwartang mobaha atol sa piniliay. Kay klarong kinawat ang kuwarta nga gisabod ug mas klarong ilegal ang katuyoan sa pagpanghatag. Maisip gani ang mga botanteng gibayran nga igo lang nibawi sa kuwartang gikawat sa politiko gikan nila.

* *  *

Labing tukma nga reaksiyon sa pagpamalit og boto mao ang pagbalibad. Apan alang ni kanhi provincial board member Maing Golo sa Leyte, pinasikad sa iyang lapad nga kasinatian sa pagpangampanya, lisod kumbinsihon ang labing kabos nga mga botante sa pagsalikway sa vote buying.

Matud ni Golo di hinuon angay’ng itahan ug gani mas maayong palapdan pa ang kampanya pag-edukar sa kinabag-an sa mga botante. Nga bisan unsa kadako ang palit sa mga politiko di makabugti sa kataas sa panahon sa ilang pag-antos ug kadako sa ilang pilde sa pagpamawi na sa mga makalingkod sa katungdanan sa dako nilang gasto sa piniliay.

* * *

Si Political Science Professor Richard Fernandez sa University of San Jose-Recoletos (USJ-R) nipasabot nga lisod papason ang vote buying kay kabahin na sa kultura. Nga sa ato pa nahimo nang tipik sa atong taras ug pagkatawo. Matud niya gipahimuslan sa mga politiko ang sayop nga pagtan-aw sa mga Pilipinhon sa utang kabubut-on. Maong ang suburno nahimong “grasya” ug inay mokiha mobugti na hinuon sa pagbotar.

Matud ni Fernandez nagkinahanglan og dakong sakripisyo ug talagsaong panaghiusa sa bahin sa katawhan. Una sila mahimong mas takos ug gawasnon sa pagpili sa mga opisyal sa gobyerno tinuoray’ng maningkamot paghaw-as nila gikan sa katimawa.

* * *

Tungod sa mainitong pagdawat sa publiko, si Kawa may daghan ug dagkong plano pagpakatap sa “Ko-Ko-Koprasa!” ngadto sa mas daghang katawhan pinaagi sa social media. Apan apiki na siya sa panahon kay unya na sa Lunes ang piniliay.

Kun gusto kang motabang pagsangyaw sa mensahe sa “Ko-Ko-Koprasa!,” mahimong mabati ang audio version online satinyurl.com/koprasa ug ang video (maghimo si Kawa og tinuod nga MTV liwas sa piniliay) satinyurl.com/koprasay.

Ug kun ganahan kang mo-download og MP3 file, aron nga manghatag sab og digital copies sa imong mga higala o magpasiugda og imong kaugalingong rekurida sa kabaranggayan, mahimong magpasakop sa email group [email protected] o modiretso satinyurl.com/kurakot.

* * *

Email: [email protected].