Mga tawong walay tagad sa edad

Cesar Barcelona Bagaipo, 70, ang labing tiguwang sa tibuok nasud, nga bag-ong nakapasar sa miaging bar exams, nga giisip nga usa sa labing lisud sa atong panahon.

Tuig 1970, samtang nagtrabaho sa PNB, nagpa-enroll siya sa law school sa Cagayan de Oro City  ug tungod sa pagbalhinbalhin sa iyang assignment, naputol-putol ang iyang pagtungha, hinungdan nga miabot og balig 42 ka tuig una niya makab-ut ang iyang tinguha nga ma-abogado.

Mi-retire siya isip manager ug assistant vice president sa PNB, ug mipadayon sa iyang pagtungha, sa walay paghunahuna sa iyang edad – hangtud nga nakapasar sa bar exams. Sa ato pa, waa siya mo-retire sa iyang pag-retire gikan sa trabaho.

T/Sg Tranquilino Olarte Cabiling, 112 years old. Bag-o lang gipasidunggan for his service to the country, Philippine Army’s oldest living veteran soldier. Si Presidente Noynoy Aquino mismo ang mitunol sa Plaque of Recognition ngadto kang Cabiling, atol sa pagsaulog sa ika-116 nga founding anniversary sa Philippine Army.

Iyang tambag ngadto sa iyang isig-ka-sundalo: “Don’t drink alcohol. Don’t womanize. Do not forget to pray to God. He can give you a long life.” Unya, sa pagkaon: “Eat healthy food, shun meat in favor of vegetables, fish and root crop.”  Wa man maghisgot og hamburger, hotdog, sandwich, pizza, ug uban pang mga fastfood nga pagkaon.

Natawo sa Hulyo 6, 1900 sa Albuera Leyte. Mipasakop sa United States Army Forces in the Far East (USAFFE) sa nagpanuigon pag 24. Sa miaging gubat sa kalibutan, na-assign siya isip gunner sa artillery division sa Leyte, ubos ni US Gen. Douglas MacArthur.  Mi-survived sa Death March, ug nakadawat siyag award, Certificate of Gratitude gikan ni US President Harry S. Truman didto sa Washington DC, Dec. 31, 1944.

Paciencia Pacibe Tamayo, 80 ang edad, bag-o lang migradwar from college, BS in Education, major in Technology & Livelihood Education, adunay 19 ka grandchildren. Daku ang iyang kalipay nga nakab-ot ra gyud niya ang iyang tinguha nga maka-gradwar sa kolehiyo despite sa iyang edad. Migradwar siya pinaagi sa Expanded Tertiary Education Equivalency & Accreditation Program (ETEEAP).

Maria Mercedes Lavarias, 71, bag-o lang migradwar sa high school pinaagi sa Alternative Learning System (ALS). Consistent first honor gikan sa grade 1 to first year. Wala makapadayon pagtungha gumikan sa kawad-on. Karon, magpa-enroll siya sa kolehiyo karong tingbukas sa klase, mokuha sa BS in Education pinaagi usab sa ETEEAP.

Matud ni Lavarias, “Learning is never too late. Be an inspiration to your children and grandchildren.”

Pipila lamang kini sila sa mga senior citizens nga wala himoang babag ang edad pagkab-ot sa buot nilang kab-uton. Ug sa walay paghunahuna sa edad, nalugwayan ang ilang kinabuhi.

Mao ni ang ilang giingon nga ang pagka-tigulang, is just a state of the mind. Meanwhile, paminaw sa Senior Citizens Hour sa dyRC, 648 kHZ matag Sabado, 4:00-6:00 pm, tels. 4125249, 4125298.