Nagkapupos nga adlaw sa pagpakaaron-ingnon

Nagkaduol na ang adlaw sa 2013  mid-term elections nga nagpasabot nga hingpit na usab nga mapupos ang mga adlaw sa pag-antus sa mga kandidato  nga motadlas sa kadalanan ug mosuot sa  mga kabus nga molupyo taliwala sa naglagiting nga kainit sa adlaw sa pagkuha sa simpatiya sa ilang kandidatura sa pag-angkon sa kadaugan.

Nunot sa nagkaduol na nga mga adlaw  sa piniliay mao usab ang timailhan nga makapahulay na usab ang mga kandidato sa ilang pagpangampanya ug ang bugtong lamang nilang mahimo mao ang pagpaabot sa resulta sa piniliay nga ang ilang galamhan daw hamokon sa  tumang kahinam ug usahay  tabyogon usab sa mga kabalaka sa kapildihan.

Ang modaug sa maong piniliay  maoy masinati ang pagsaulog sa tumang kalipay apan ang makaangkon og kaparutan maoy mohangop sa galamhan ang kaguol sanglit wala man gayod magbunga og kadaugan ang pagpaningkamot sa ilang pagpangampanya sa pagkuha unta sa simpatiya sa katawhan sa ilang kandidatura.

Dugang pa niini sa  pagtapus na sa mga adlaw sa kampanya nga gihatag nga kahigayonan sa Commission on Elections (COMELEC)  mao usab ang pagkapupos sa mga adlaw sa pagpakaaron-ingnon sa mga kandidato nga moagbay  ug makiglamano  sa wala ug tuo nga ubanan pa  sa naghiwi og ahat nga  pahiyom sa ilang pamayhon.

Dili ikalimod nga adunay pipila ka mga kandidato nga kugihan kaayong mosuroy ug motungtong sa entablado  sa matag gabii nga gihimong pulong-pulong sa ilang partido apan human sa piniliay  nga gipahigayon mapildi man o modaug  gawas nga dili na maduol sa mga tawo,  mahanaw lamang usab sila nga daw  buwa  ug ang mga tawo  magkabuang sa pagpangita tungod kay bisan  ang ilang anino dili na man makita.