Alkanse sa Subic, Legazpi ug Sugbo

Human gideklarar ang 600,000 ka sakong bugas humay nga gitanggong karon sa pantalan sa Sugbo nga maoy labing daghan nga nasakmit sa Bureau of Customs (BOC) sukad masukad, si Deputy Commissioner Danilo Lim nitumbok sa laing duha ka dagkong shipments sa pinayuhot nga bugas nga ilang nasakpan:

Ang 420,000 ka sakong bugas humay nga balor og P500 milyones nga ilang nasakmit sa Subic Bay Port sayo sa niaging tuig; ug

Ang 94,000 ka sakong bugas humay nga balor og P135 milyones nga ilang nasakmit sa pantalan sa Legazpi City niadtong Marso karong tuiga.

* * *

Ang wa isulti ni Lim sa publiko mao nga usa ra ka pundok ang ilang gidudahan nga nagpaluyo ning tulo ka nabaraw nga mga pagsuway pagpayuhot sa bugas gikan sa India ug Vietnam. Kasaligang tinubdan nagbutyag nga samang pundok ang nagpaluyo sa labing dagkong rice smuggling sa Sugbo ug ubang pantalan sa nasud sa nangaging katuigan. Nipasalig si Lim nga dugang dagkong kaso sa pagpayuhot sa bugas humay, mga sakyanan ug ubang kontrabando ang ilang masakpan sa umaabot nga mga adlaw. Matud niya nagsugod na og pamunga ang kapin na sa tuig nilang profiling sa nangaging mga importasyon paglista sa mga timailhan sa legal ug ilegal nga mga kargamento.

* * *

Masaligon si Lim nga ilang mailhan ang tinuod nga responsable sa rice smuggling sa Sugbo bisan peke ang mga kompaniyang nalista isip consignees: JJM Global Trading, JM-ARS Trading, Neon Gateway Trading, Ocean Park Enterprises, Custans Enterprises, Melma Enterprises, NMW Enterprises ug MMSM Trading. Lahi ang mga kompaniyang gilambigit sa rice smuggling sa Subic: Masagana Import-Export Incorporated, St. Andrews Field Grains and Cereals Trading ug Amira Foods. Kumbinsido si Lim nga gigamit lang ang nalistang consignees sa kontrabando sa Legazpi: Samahan Ng Magsasakang Kapampangan at Katagalugan, Malipampang Concerned Citizens, Inc., Ugnayang Magbubukid ng San Isidro, Inc. ug Kapatirang Takusa.

* * *

Di taphaw ni hilaw ang mga nagpaluyo sa nabaraw nga tulo ka dagkong kaso sa rice smuggling. Nanggungis na sila sa nangalisbo nga raket. Di sila magpatugatuga og pangompra ning gidaghanona sa bugas kun wa sila’y gamhanang koneksiyon nga nipasalig nga makalusot ang ilang kargamento. Di sab gamay ang ilang alkanse sa nabulilyasong mga importasyon. Kun tinuod nga tag-P1,200 ang ilang bayad sa matag usa sa kapin sa milyon ka sakong bugas humay nga nasakmit sa Subic, Legazpi ug Sugbo, di sensiyo ang nawa nila. Di sila mangiyugpos atubangan ning higanteng bulilyaso. Duha ang posibleng mahitabo sa mosunod nga mga adlaw: Magpasiugda sila og maniobra nga kamenosan ang alkanse; ug maningil sila sa mga nipasalig apan napakyas pagdupa sa ilang raket.

* * *

Email: [email protected]