Hakot, palit ug banabana sa mga rally

Ang kadaghanan sa mga politiko manghakot ug mamalit gayud og mga tawo aron motambong sa ilang mga political rally.

Dili kini matago kay daghan mga gipalit ug gipanghakot ang manulti ngadto sa ilang mga higala.

Gawas niana anaa pay mga T-shirts ang ipanghatag. Dili man gud ka makatoo nga ang mga botante maoy naghimo o namalit niini.

Anaa usay daghang mga napalit apan nangreklamo kay inay P300 ngadto sa P500 ang ilang nahibaw-ang palit, P120 na lang maoy ilang madawat. Kapnan man gud kini sa ilang mga lider kay alang kuno ibayad sa ilang sakyan.

Sumala pa sa mga political analysts nga dinhi sa Cebu City close fight kaayo sila si Mayor Mike Rama ug Kong. Tomas Osmeña. Ang daghan og campaign funds mao kunoy modaug niining umaabot nga eleksiyon. Kun tinuod kini, mas maayo pa diay ang mga botante sa Mandaue City nga wala magpadala sa salapi niadtong miaging piniliay.

* * *

Dili pa ba gihapon kaantigong mobanabana ang atong kapulisan sa gidaghanon sa mga tawo nga motambong og rally ug ubang panagpundok?

Sa rally gud sa Team Rama gibanabana kadto sa kapolisan nga sobra sa 30 mil ka mga tawo ang nanambong. Naglisud na gud kuno og agi si Mayor Rama mao nga gisung-ay na lang siya sa mga dumadapig,

Apan ang tawo ni Kong. Osmeña miingon nga tulo ka libo ra ka mga tawo ang nanambong sa maong rally.

Sa laing bahin, sa rally sa Bando Osmeña - Pundok Kauswagan (BOPK) ug sa Liberal Party (LP) sa lalawigan sa Sugbo nga gitambongan ni Pres. Noy Aquino ug ubang mga kandidato pagka-senador.

Gibanabana ni Cebu City Police Director Sr. Supt. Natuel nga mokabat og 65 mil ang mitambong sa maong rally. Mora og dili maayo ang reaksiyon sa mga tawo, labi na sa mga dumadapig sa Team Rama, kang Natuel tungod kay wala man kini siya higustuhi ni Mayor Rama.

Tingali kuno og nisipsip lang siya kang Kong. Osmeña basin na lang og modaug ang BOPK sa umaabut nga eleksiyon ug matudlo siyang pirmanenteng police chief sa Cebu City.

Apan ang Philippine Information Agency (PIA) nga gipanag-iya sa gobiyerno mikutlo sa pamahayag sa usa ka opisyal sa police nga 15 mil ang mitambong sa maong rally.

Ang pagbanabana ibasi sa gidak-on sa lugar unya i-multiply kini og duha ka mga tawo nga motindog sa matag metro kwadrado, mao kana ang gidaghanon sa manambong.

* * *

Ako motoo sa mga survey sa mga kasaligang mga survey firms sama sa Social Weather Stations (SWS) ug Pulse Asia sa kauluhan.

Dili pagsabton nga ang resulta sa ilang mga survey perpekto na apan alang kanako katuhuan na gayud kay mas daghan ang kamatuoran sa resulta sa ilang suhid. Aduna hinoon akoy pagduda sa ubang mga survey labi na gayud ang gipasiugdahan sa mga politiko ug sa mga wa-il kon wa ilhing kompaniya.

Kinahanglang di kita magpada niini tungod kay ang ilang tumong ug tuyo mao ra gayud ang pag-ilad sa mga botante.

* * *

Si Commission on Elections (Comelec) chairman Sixto Brillantes nipahibawo nga dili siya modimiter sa iyang katungdanan.

Alang kanako dili husto kadtong iyang hulga sa pag-resign tungod lang kay ang Comelec kanunay masupalpal sa korte suprema.

Maayo unta og gihilum lang usa niya ang iyang hunahuna ug mikunsulta lang usa siya kang Pres. Aquino, Bise Pres. Binay ug sa iyang mga anak usa siya mipahibawo sa iyang kahiubos nga mikonsiderar gani siya nga mo-resign. Karon hinoon makaingon kita nga nagpadungag lang siya sa pusta kon nagpapugong lang aron ilhon nga importanteng tawo.

Kun ako pay presidente ako siyang papilion kun unsay iyang gusto.

Nagpatoo na hinoon ang iyang mga alalay nga magubot ug dili magkadimao ang piniliay sa sunod tuig nga eleksiyon kun dili na siya ang Comelec chairman. Sa pagka-tinood modagan ra ang Comelec bisan kun wa diha si Brillantes.

* * *

Belated birthday greeting ngadto sa akong higala ang kanhi konsehal sa Cebu City si Ernesto "Pretty boy" Elizondo nga nagsaulog sa iyang ika-79 ka kasumaran sa iyang adlaw nga natawhan sa Baseline Restaurant niadtong Domingo. Naguba ang diet sa akong mga higala tungod sa makabuhong nga mga pagkaon sama sa seafoods ug uban pa. Ang iyang kauban kaniadto sa konseho, karon  Mayor Mike Rama mao ang pinasidunggang dinapit. Pulos awit walay  pamolitika sa  maong selebrasyon.

* * *

Email: [email protected] .