Mga ang-ang ug ang mga sikolohikal nga implikasyon sa paglubong

Ang lubong usa ka hinan-ay nga pagsanong sa hitabo sa kamatayon. Kini pagalangkoban sa mga rito kon mga seremonyas nga naglambigit sa namatay, sa mga kabanay, ingon man sa mga nitambong. Si Howard Raether ang niila ug nilatid sa lima ka mga ang-ang sa paglubong. Kini ang naglangkob ning mosunod:

    A. PANAGBULAG- Diin ang " minatay " ang ilain gikan sa mga buhi. Ikapakita kini pinaagi sa haya. Ang lungon nga gihigdaan sa minatay usa ka pahinumdom nga dili siya buhi kondili patay na.

B. PAGDUAW- Ang minatay ang pagahayaon alang sa pagduaw. Ang iyang mga kaila o si bisan kinsa ang moduaw aron mohatag og pahasubo sa pamilya sa namatay.

C. RITO SA PAGLUBONG- Diin ang mga pangulo sa usa ka relihiyosong pundok (75%) o mga layko (25%) ang mangulo sa maong Rito sa Paglubong.

D. PROSESYON- Simbolo kini nga ang panagbulag nga nahitabo gumikan sa kamatayon usa ka permanenteng hitabo. Nga angayang pagadawaton sa mga hingtungdan. Ang panaw padulong sa sam-ang o minteryo pagpakita lamang nga nahitabo na gyud ang panagbulag tali sa mahal sa kinabuhi nga mitaliwan ug sa mga buhi nga nahabilin pa.

E. PAGTUGYAN- Diin ang minatay ang ipahiluna sa iyang pahulayan nga mao ang iyang lubong.