Dili makapukan

Wala nay luwas nga lugar karong panahona kun mogara na ang mga kriminal. Kini atong nasaksihan sa pagpamomba sa Boston Marathon didto sa Estados Unidos sa nakalabay’ng semana.

 Mokabat sa tulo ang patay ug subra sa usa ka gatus ang naangol sa maong pagpamomba. Usa kadto sa grabe nga pagpamomba sa Amerika sugad niadtong September 11, 2001.

Sa akong pagsulat niini, adunay suspek nga nakit-an ang otoridad didto sa Boston nga posibleng may kalabotan sa maong insidente. Sa pagkakaron dili pa makaingon ang otoridad didto kun bunga ba gayud ang insidente sa terorismo ug nga unsa nga grupo ang nagpaluyo niini.

Apan bisan pa man kun binuhatan ba kadto sa mga iladong grupong terorista o dili, klaro nga ang maong pagpamomba usa ka “act of terror” kansang tuyo mao ang pagsabwag og kalisang sa katawhan.

Wala nay gipili ang mga kriminal ning panahona. Bisan pa ang inilang marathon sa Boston, diin liboan ka partisipante sa tibuok kalibotan ang magtapok matag tuig, wala gayud nila pasayloa  

Mao pa kadto ang ngilngig nga panghitabo sa kasaysayan sa maong marathon, ang usa sa labing dako ug inila nga kalihokan sa paugnat sa kusog didto sa Amerika. Ug sa sunod nga edisyon sa Boston Marathon, siguradong mas grabe nga siguridad ang ipatuman sa otoridad alang niini.

 Abi nako’g sa sine lamang nato makita ang panghitabo diin ang mga terorista moatake sa mga dagkong sports events. Apan tinuod na gayud diay karon panahona nga bisan pa ang mga kalihokan sa paugnat sa kusog nga nag-promote og unity ug brotherhood sa tanan dili na luwas gikan sa mga terorista.

Hinuon dili na bag-o pa ang terorismo sa mga dagkong sports competition. Siguro atong mahinumdoman ang masaker sa mga atletang Israeli sa mga Arab terrorists atol sa Munich Olympics didto sa Germany niadtong dekada setienta.

Apan ang nanghitabo sa Boston Marathon dili gayud makapukan sa espiritu niini. Gani mas molig-on pa ang pagpahigayon niini gumikan kay aduna kini common goal nga mao ang pagsabwag og mensahe sa kahiusahan sa tanan.