Bisan simbahan gihimong basurahan

Pagsimba nako sa Sto. Rosario Church, hapit matagak akong mga mata dihang maoy misugat sa pagluhod ko kadtong mga biyang putos sa kendi ug biskwit nga naglaundok tungtong sa likorang bahin sa taas nga lingkoranan. Mikunot akong agtang nga nakapangutana: “Kinsa kahang tawhana ang naghimo’g basurahan ning balay sa Ginoo, no?”

Niadtong gamay’ng bata pa ko, gitudloan mi sa among katekista nga respetohan gyud kanunay ang simbahan. Kun mosulod, kinahanglang walay magtabi, dili isagudsod o i-tiktak ang sapatos ug labaw sa tanan, dili maghugawhugaw pag-abot sa sulod. Gidili ang pagkao’g karmelitos o pag-usap-usap og pan bisan ang pagdala’g binotelyang mainom, tubig man o juice, wala itugot.

“Ang simbahan balay-alampoanan. Dili restawran. Templo kini sa atong Magbubuhat. Busa, angay ampingan nga dili mahugaw. Kun panahon sa misa maatlan mong uhawon o gutomon, agwantaha lang. Inig panggula na, inom ug kaon. Total usa ka oras ra bitaw ang misa. Sayon  ra kaayo ning antuson. Miyentras bata pa mo, praktis og puasa.” Mga pulong sa katekista niadtong 1963 pa, apan hangtod karon nagpabiling lab-as sa akong panumdoman. Gisunod gyud namo ang unsay bawal.

Hinungdan, nga nainat gyud akong kilay dihang nakita ko ang hugaw’ng tissue paper tipon sa nagtapok nga mga putos sa kendi ug biskwet didto sa may kantong likod nga bahin sa lingkoranan sulod sa naasoy’ng simbahan. Nagpasabot ba kini nga wala nay mga katekista nga nanudlo ngadto sa katawhan sa hustong pamatasan nga angay sundon sulod sa simbahan? Kun ugaling aduna pa, nganong daghan mang manimbahay nga naghimo sa Sto. Rosario Church nga basurahan? Dili baya ni maayo, do! Masuko ang Ginoo niini. Di ba gipangtuwad man gani ni Hesukristo ang lamesa sa mga negosyante ug sugarol, kinsa naghugawhugaw sulod sa balay sa iyang amahan?

Hangyo lang. Intawon, ayaw himoang metro aide ang mga pari nga maoy tigsunod sa hugaw nga inyong ibilin. Itanom nato sa atong kasingkasing nga ang simbahan dili usa ka basurahan; kun dili, usa ka balaanong dapit nga nagkinahanglan sa atong tiunay nga pagrespeto. Dili na nato kini hugawhugawan, Bay. Limpiyohan nato sa mga sagbot ang simbahan sama sa pagpanglimpiyo sa atong kalag.