Si Bella Ruby ug Customs

Naka first base na si Bella Ruby Santos ang akusado sa pagdagit ug pagpatay sa bata nga si Ella Joy Pique. Kini human tugoti sa hukmanan si Santos nga makapiyansa sa kasong iyang giatubang.

Ubos sa balaud, ang akusado nga mag-atubang og kasong ang silot kamatayon o pagkapriso sa tibook kinabuhi dili tugotan nga makapiyansa apan kun huyang ang ebidensiya batok kaniya, siya tugotan nga makapiyansa. Tungod kay gitugotan man sa hukmanan nga makapiyansa si Santos nagpasabot lamang kini nga huyang ang mga ebidensiya nga gihuptan karon sa prosecution aron gamiton sa pagtaral kaniya.

Ang pagtugot sa hukmanan ni Bella Ruby Santos nga makapiyansa usa ka wake up call sa prosecution ug sa kapolisan sa pagpalig-on ug sa pagpangita pa og dugang mga ebidensiya kun buot man gyod ugaling niining konbiktohon si Santos.

Ang pagtugot sa hukmanan  ni Bella Ruby Santos nga makapiyansa usa ka kamatuoran nga ang mga ebidensiya nga gihuptan karon sa prosecution ug mga polis dili lig-on ug dili igo nga makapatanggong ni Santos sulod sa prisohan sulod sa tibook niyang kinabuhi busa kinahanglang modoble sila sa ilang kayod ug mga paningkamot kay kun dili, tawgon unya sila sa mga tawo nga maayo lang manghambog.

* * *

Kapin sa usa ka libo ka container vans nga bugas gikan sa Vietnam ang nasakmit sa mga sakop sa Bureau of Customs niadtong Marso 22 - Abril 3 ning tuiga. Ang maong bugas nagkantidad og kapin sa usa ka bilyon ka pesos. Ang mga bugas gipanag-iya sa mga major players dinhi sa Sugbo.

Sigun sa hung-hong sa akong higalang duwende, ang kontrabando kun nakalusot pa gamiton unta kini sa piniliay karong Mayo tungod kay ang tag-iya sa usa sa mga kontrabando suod ug kapariha ang bansagon sa nagpapili pagka kongresista dinhi sa dakbayan sa Sugbo. Kun kinsa ni siya, kamo na lang ang ila-ila kaniya. Anyway, nakahibawo ko nga nakaila mo niya. 

Ang Customs nakasakmit sa mga kontrabandong bugas kaniadto pang Marso 22 hangtod Abril 3 pero nganong bag-o pa lamang nila kining gipahibawo? Gilangay-langay ba nila ang pagpahibawo niini tungod kay wala pa maklaro ang ilang sabot-sabot ug kay wala magkasabot maong wala nila kini palutsa? Nangutana lang.