ABRIL 14, 2013: Ikatulong Domingo sa Pasko sa Pagkabanhaw

Mga Pagbasa:   Buh,5;27-32,40b-41/Sal.30/Gip.5;11-14/Jn.21;1-19

Balik sa sinugdanan

 Ang preceeding event nga mao ang dugoon nga kamatayon ni Jesus sa balabag sa Krus maoy nakapaluya sa mga apostoles labina ni Pedro. Tungod niini, nagpalain siya. Bout niyang mobalik sa naandang pagkinabuhi nga mao ang pagpanagat. Tuod man nanagat sila apan wala silay kuha. Sama niadtong unang gikahibalag nila ang Ginoo giingnan sila kaniadto itaktak ang inyong pukot sa tuo ug makakuha kamo. Ug nakakuha sila. Dunay kalainan na kaniadto sa ilang pagkinabuhi. Gikan sa pagpanagat og mga isda ngadto na sa pagpanagat na og mga tawo. Kini usab ang gihimo ni Jesus ning ilang panagtagbo. Pagpahinumdom kanila sa sinugdanan sa ilang pagpangalagad. Pahinumdom kanila sa ilang kaakuhan nga angayan nilang padayonon bisan pa man kun wala na ang Ginoo uban kanila sa linawas na panaw.

Kadaghanan kanato ang nahisama kang Pedro nga nakasinati og kaparotan gumikan sa pagkapukan sa tagsa-tagsa nato ka mga pangandoy ug gilauman. Sa matag higayon nga kita makasinati ning mga butanga mahinungdanon kaayo ang usa ka ritwal nga makahatag kanato og kabaskog ug kalig.on. Kay imbis hinumdoman ang bisan unsang makapaluya nato, atong hinumdoman ang nakahatag kanato og kalig-on ug inspirasyon. Kun ato kining hunahunaon sa kanunay dunay hinungdan ug kahulogan ang atong pagpakabuhi.