Aliwan 2013

Nagpadayon na ang 2013 Aliwan Fiesta didto sa Pasay City diin daghang mga festival contingents gikan sa nagkadaiyang lalawigan ug mga dakbayan ang nangapil sa indigay alang sa kampyonato.

* * *

Subo lang hunahunaon nga ang atong “best bet” sa maong prestihiyosong indigay kultural nahikawan og partisipasyon gumikan sa kakuwang sa badyet. Ang atong bantugang Tribu Basakanon kinsa nakadaug na og kampyonato sa Aliwan og tulo ka higayon wala makaapil sa kompetisyon.

* * *

Hinoon ang atong kandidata sa pagka Rayna sa Aliwan Fiesta 2013 miapil sa indigay ug gani suma pa sa mga prediksyon hayan maoy mosignit sa titulo alang sa Sugbo sa ikalimang higayon. Siya mao si Jamie Herrell ang sa pagkakaron Sinulog Festival Queen.

* * *

Apan ang gianugonan sa kadaghanan mao ang pagkapakyas nato sa pag-apil  sa indigay sa festival champion ang titulo nga katulo na dauga sa Sugbo diin ang pambato nato mao ang Tribu Basakanon.

* * *

Daghan ang naglisud sa pagtuo nga ang Sugbo walay kuwarta nga ikagasto sa partisipasyon sa Tribu Basakanon didto sa Aliwan Fiesta 2013. Bisan gani ang mga gagmay nga dakbayan sa Kabisay-an ug Mindanao nakapada man og ilang pambato.

* * *

Matud pa sa usa ka tigpaniid, politika maoy nakababag sa atong partisipasyon sa maong nasudnong cultural event karong tuiga.

* * *

TRIVIA. Mangumusta kita sa atong mga magbabasa diha sa Samboan ug Santander, lakip na nilang Mr. and Mrs. Leandro Lagman sa Bato, Samboan. Daghagn salamat sa inyong suporta sa Banat News.