Ang Catholic vote

Ang eleksiyon sa Mayo 13 maoy sukdanan unsa kalapad ang gitawag nato og “Catholic vote” human mapasar sa Kongreso ang kontrobersiyal nga Reproductive Health law.

Gisugdan kagahapon sa grupo ni Bro. Mike Velarde nga El Shaddai ang paghugpong aron ipahibalo nga mo-uban sila sa panawagan sa kadagkoan sa Simbahan pagpakita sa gahum sa Catholic vote sa sunod bulan nga eleksiyon.

Sa akong tan-aw, adunay positibo nga tubag ang mga Katolikong Pilipino niining panawagan sa Simbahan nga dili botohan ang mga “Team Patay” – kadtong mga kandidato nga naninguha ug mibotar sa RH law.

Kini nga panawagan usa ka positibo nga paggamit sa demokrasya alang sa pagpatigbabaw sa moralidad.

Ug sibo lang nga ang magsugod niini mao ang mga botante nga mga Katoliko.

Karong mga panahona, hilabihan na kadaghan sa mga imoral nga mga kandidato. Kay lagi nagpasulabi ang ilang pagka-imoral, ang ilang mga posisyon sa mga balaodnon nga nag-ung-ong sa Kongreso motipas gayod sa kun unsay moral ug madawat sa mata sa konsensiya.

Daghan sa mga politiko nagpuyo sa imoral nga kinabuhi. Adunay mga kabit, puyo-puyo ug mga uyab. Makadungog na lamang kita nga usa ka artistang guwapa gi-uyab og kongresista nga minyo.

Aduna gyuy estorya nga usa ka kandidata pagka-senadora nga hilabihan ka-pabor sa RH law uyab og usa ka miyembro sa kabinete ni Pres. Noynoy Aquino.

Adunay laing kandidata pagka-senador nga giingong uyab-uyab og usa ka magbabalaod.

Laing kandidato pagka-senador nga nangandoy nga mo-number 1 sa survey mi-slidedown hinuon sa ikatulo kay ang ginikanan sa iyang uyab nga artista nagpa-interbiyu sa media ug nangahas nga mobabag gyud sa relasyon sa ilang anak nga guwapa ug sa senador kay ang senador hilabihan kahambugero, palahubog ug hinigarilyo unya wala pa gyuy kaayuhan nga nahimo sa iyang probinsiya nga gigikanan sa Bicol.

Unya kining tawhana gusto kaayo nga mapasar ang balaod nga magtugot sa abortion nga klarong makadaot sa kababayen-an.

Usa sa positibong tubag sa hagit sa simbahan mao ang pagpaila sa mga Katoliko ug dili Katoliko nga sila sakop sa Team Buhay.

Hinuon layo-layo pa ang eleksiyon. Pero kining eleksiyona ang mosukod unsa kakusgan kining gitawag og Catholic vote.