Pabaga sa nawong
Taliwa sa mga pahimangno sa Commission on Elections ngadto sa mga kandidato nga mosunod sa hustong lagda sa kampanya daghan kun di man gani tanan gyud nga mga kandidato ang wala mosanong niini.
Usa sa kumon kaayo nga kalapasan nga nahimo sa mga kandidato mao ang pagpataka lang og papilit sa ilang mga campaign materials.
Ang lagda sa Comelec nag-ingon nga ang mga campaign materials adto lang mamahimong ibutang sa mga designated poster areas.
Duna hinuoy problema niini tungod kay di klaro hain ang maong dapit hinungdan nga ang mga kandidato nagpataka na lang og papilit sa ilang dagway.
Pero syaro naman pud niining uban nga mga kandidato nga bisan sa klaro gyud kaayo nga dapit nga gidili tuyoon man gyud pagbutang ang ilang posters.
Pananglitan ang mga punoan sa kahoy ug ang mga pribado nga mga dapit sama sa pinuy-anan. Ako mismo biktima sa usa ka kandidato pagkakonsehal dinhi sa dakbayan nga nagpataka lang og papilit sa iyang dagway.
Ang akong gipasabot ang usa sa mga kandidato sa Team Rama nga si Lotlot Ignacio. Wala ko makaila niya sa personal mao nga nahingangha kaayo ko dihang ang apartment nga akong gipaabangan naputos na sa iyang mga posters.
Akong giingnan ang nag-abang nga ipatangtang apan tungod kay wala man gyud kuhaa akoy personal nga nanglangkat niini. Ang gihimo sa maong kandidato o sa iyang mga sinuholan nagpakita og kakuwang sa respeto ngadto sa mga tag-iya og pribadong luna. Kun ingon na niini ang batasan nga gipakita sa usa ka kandidato nga wala pa gani makalingkod sa pwesto musamot ang ka way batasan niini kun duna nay gahom nga huptan.
Mao nga mentras di pa uwahi angayang atong pilion pag-ayo ang mga kandidato nga atong botohan. Ug alang nako ang mga kandidato nga sama ka way batasan ni Lotlot Ignacio wala gyu’y angay nga mamahimong magbabalaud dinhi sa dakbayan.
Makita nimo ang breeding sa usa ka kandidato diha sa paagi sa iyang kampanya ug sa pagsubay niya sa hustong lagda. Ug usa sa kandidato nga akong namatikdan nga desente ug respetado mao si Inday Tikay.
Di sab mi kaila personal niya apan sayod ko nga kauban siya sa buhat. Pero dili tanang sakop sa media nga nisulod sa politika sama niya.
Ang uban natakdan na ug gilamoy na gani sa sistema. Nakakat-on na sab og pabaga sa nawong.
* * *
- Latest
