EDITORYAL - Ang awhag pagpalibkas sa suspension sa RH Law

Ang  Korte Suprema human pabaha  og  petisyon  nga  nagpugong  niini  pagpatuman  sa  Reprodutive Health (RH) Law  misanong  ug  misanta  sa   pagpa-epekto  sa maong balaod  human  kini aprobahi  sa  kongreso  ug  ni  Presidente  Aquino.

Kini  tungod  kay  gusto  sa  Korte  Suprema  nga motuman  sa ilang  katungdanan isip  kuyme  sa tanang  kaso nga  dinagko  nga  nagkinahanglan  sa ilang  pagtagad.

Gusto  nila  nga  ipabati  sa  tibuok  kalibotan  nga  sila  isip  labaw  nga  hukmanan  sa nasud  kaantigo   maminaw  ug  dayon  mohatag  sa ilang  katapusang  hukom  sa  mga  kaso  nga  makaabot  ngadto  kanila. Mao  bitaw  nga  tungod  sa  naglaundok  nga  mga  petisyon  sa pagbatok  sa RH Law,  nakahukom  ang  Korte  Suprema  sa  pagsuspenso  og  tulo  ka  buwan  sa  maong  balaod.

Kini  aron  silang  mga  labaw’ng  maghuhukom  sa nasud  motuon  sa  maong  balaod  itandi  sa gibug-aton  sa mga    katarungan  sa  mga  mipetisyon  batok  niini.

Sila  mismong  mga  banggiitang  huwes  sa  labaw’ng  hukmanan  mao  ang  mag-estukada  niini,  pinaagi  sa lantugi  dayon  magbotasyon  ang  mga  hingtungdan  aron  masuta  ug  maihap   kinsay  pabor  ug  supak  sa  maong  balaod .

Kun  sa  ilang  kuwerpo masuta  nga mayoridad  ang  supak  sa  maong  balaod, human  sa tulo  ka buwan  nga  tagal  sa ilang  pagtuon  niini, mahimong  ideklarar  nila  ang  hingpit  nga  pagbaraw  sa  RH  Law.

Busa makatarunganon  ang labaw’ng  hukmanan  dihang  gisalindot  ug  gibasura  niini  ang  petisyon  nga  nag-awhag  nga  ipalibkas  na  ang  suspension  sa RH  law.

Kay  ang  maong  petisyon  murag  nagpakgang  sa Korte  Suprema  sa  ilang  lakang  nga  ikatunol  nila  ang  hustisya  ug  katarungan  nga gipangita    sa  mga  mipasaka  og  petisyon  batok  sa RH  Law .

Sa laktud  murag  buot  sila pugngan  sa sagrado  nilang  katungdanan  sa  pagpaminaw  sa  mga  positibo  ug negatibong  aspeto    sa  mga  baruganan  sa  mga  miuyon  ug  misupak sa RH  Law.

Ang  tinuod  kun pabor  man  ang  mayoridad  sa kababayen-an  sa RH Law,  asa  man  diay  ang puwersa  sa  mga  pundok  kababayen-an  aron badlungon  nila  ang  kaparian  nga  maoy  sipa  kaayo  nga  mibatok  sa RH  law?