Pananglitan...

Daghan kaayong mga isyu ug mga saad nga atong madunggan sa mga kandidatong lokal. Apan ang kasagarang hisgutan mga damgo nga nindot sab unta kun matuman apan medyo lisud kab-oton ang katumanan.

* * *

Pananglitan, wa gyuy misaad nga ipatuman og hingpit ang mga lagda kabahin sa pedestrian lanes. Kining maong kasuguan nga milambigit og kinabuhi sa ordinaryong lungsuranon giyamayamaan lang sa daghang tarantadong drayber.

* * *

Pananglitan, hagbay rang nagkinahanglan kita’g public toilets apan morag wa makaila ang daghang local candidates kun unsa kini. Busa makabasol ba kita adtong tiguwang babaye gikan sa usa ka lungsod nga nalibang diha sa kanal duol sa nasunogan nga bilding.

* * *

Pananglitan, naay daghang namaligya’g pagkaon daplin sa dan nga gikinamot ug walay hapin-hapin ang mga kamot nga gigamit sa paghikap sa mga sud-ang gibaligya.

* * *

Pananglitan, naay mga boring nga walay kukauwaw mamaligya sa ilang unod  atol sa kagabhion diha sa may dan Colon kinsa pinasagdan lang sa kapolisan bisan kini nakahimo og mangil-ad nga imahe sa atong dakbayang Kristohanon.

* * *

Ug uban pang mga pananglitan. Di ba angayan nga hatagan kini og pagtagad sa mga kandidato nga gustong ilhong lider sa atong siyudad?

* * *

TRIVIA. Maayong buntag sa atong mga magbabasa diha sa munisipyo sa Catmon ug Sogod ug siyudad sa Danao. Salamat sa nagpadayon ninyong pagsuporta sa Banat News.