EDITORIAL - Kinahanglan pa ba diay nga buhisan og kinabuhi?
Ambot kun ngano ba usab nga ang mga estudyante sa UP Manila nga dugay na nga nahasol sa pamaagi nga gipatuman sa tagdumala sa maong eskuylahan nga “no permit, no exam†gipaabot pa man nga hikogan sa ilang kauban aron masumpo ang maong balaod.
Nganong wa man sila mopalanog sa ilang reklamo ngadto sa mga kadagkoan sa kagamhanan aron kahimoan og lakang ang pagpahunong sa maong sistema nga malupigon ug madaug-daogon sa mga kabus nga estudyante.
Kay kun nasayran pa tingale kini sa mga magbabalaod, malagmit dugay ra nga nahimoan og balaod nga di angay sa mga eskuylahan sa kagamhanan ang pagpatuman og hilabihan ka higpit nga pamaagi bahin sa tuition ilabi na sa mga kabus nga estudyante.
Kay kun ingon niini ang ilang kahigpit, asa naman lang paingon ang mga kabus nga tinun-an. Kun sa pribadong mga eskuylahan wa sila’y luna nga makaeskuyla didto tungod kay kuwarta ang gikinahanglan niining mga eskuylahana, ug di mabasol ang mga tag-iya niini, kay usa kini ka negosyo alang kanila nga nagkinahanglan gayud nga mokita, busa alang kanila matirang matibay basta ipatuman gyud ang no permit,no exam policy.
Apan sa mga eskuylahan nga iya sa gobiyerno, nga may subsidiya sa kagamhanan, kansang operasyon ug suhol sa mga magtutudlo gigahin na matag buwan, ang pagpatuman niini sa no permit no exam policy nagpasabot nga kining eskuylahana maoy nagsurambaw sa programa sa gobiyerno.
Kay programa sa gibiyerno ang paghatag og libreng edukasyon sa mga kabus aron kini makalampos og kurso.
Karon nga may naghikog na gumikan sa no permit no exam policy, milihok ang mga magbabalaod sa pag-umol og balaod batok ning sistemaha, may mga magbabalaod nga nag-inamotay pagtigom og P100 ka milyon aron ihinabang sa eskuylahan sa gobiyerno, ang SSS mitanyag og study now pay later plan, ug uban pa. Nganong gikinahanglan pa nga hikogan una molihok ang atong gobiyerno?
- Latest
