Ang kapuslanan sa tubig

Nahibalo, na kita nga ang tubig bililhon kaayo sa atong kinabuhi. Maghatag kinig kalimpyo sa atong palibot. Kun kastigohon ta sa kahitas-an, puohon kita pinaagi sa lunop o baha, kay wa kita magpakabana sa pagmahal sa kalikopan. Mopabugnaw usab kini sa kainit karon sa atong panahon. Mohatag sab ni og kahupay sa kakutas sa kinabuhi.  Labina, kun way tubig mamatay kitang tanan.

Ang kinatibuk-an sa atong panglawas, gipaburot pinaagi sa  80% sa tubig. Kun kulang ta niini, dakong kadaot nga permi ma-aberiya ang atong lawas. Ang tubig maoy numero unong nutrisyon sa panglawas. Mopasirkular kini sa tibuok sistima sa atong lawas. Bahala’g wa kay makaon basta may mainom kang tubig, mas molahutay pang mabuhi kay sa pagkaon lang nga magkalisud matuk-an ta.

Malipayon ug lunhaw og presko kayo ang mga tanom, nga gitubdan sa tubig nga nanuybo nga naghatag paglaum kanato.Tanang produkto nga atong gikinahanglan, gipaluyohan kana sa tubig nga hatag kanato sa kahitas-an. Busa dili nato usikan o among-amongan ang tinubdan sa tubig kay sagrado kana. Magkat-on kita og mga pamaagi nga mas daghang kaayohan magamit ang tubig.

Kulang kita sa suplay sa tubig kun maoy gisaligan nato ang tinubdan sa yuta o kabukiran. Gani ang atong nasod naninguha man sa paghimo og ginagmay o dinagkong kapundohan sa ulan nga tubig nga limpyohan pinaagi sa kemikals una kini ikutay sa tubo nga luwas na gamiton sa katawhan. Hinoon tungod sa bag-ong teknolohiya, ang ubang nasod naa sa dagat magkuha og himuong tab-ang.

Dinhi sa atong dakbayan, duna nay misagop nianing paagiha, ilabi na kadtong gipangtukod nga tag-as nga mga bilding, diha sa kadaplinan sa dagat.  Ang mga reclamation project sama sa Cebu, kun mapuno sa mga bilding nga paspas kaayong milipang nga morag ohong nanurok sa pagkakarong panahona. Ang atong kagamhanan may plano na ini, kay kulangon man gyud kita sa tubig.

Samtang wa pa kaayo mauso ang paghimog planta nga ang dagat patab-angon, may mga kompaniya o foundations mapubliko o pribado man padayon nga nangita’g mga tinubdan sa tubig nga kakuhaan diha sa kabukiran. Binilyon kining proyektoha kay hapit na ta maunlod sa hilabihang kadaghang kalamboan nga nakapadugok sa atong kaliwat manimpad sa usa ka siyudad sama sa Cebu.