Feeling na lay hawod

Ang labing uwahing bulilyaso ni suspended governor Gwen Garcia sa Sandiganbayan maoy pruyba nga wa pa gyud siyang kaamgo nga di na niya makuha ang bisan unsa niyang gusto. Nakalimot tingali nga di na si kanhi presidente Gloria Arroyo ang nagtungkawo sa Malakanyang. Nga di na niya mahudlat ang bisan unsang buhatan sa gobyerno kay mas sikit pa kay sa ampaw sa Carcar ang iyang koneksiyon sa palasyo.

Sa laktod, di na siya hawod. Kinahanglan na siyang motuman sa balaod. Ug nga kun ganahan siyang magsupak-supak, di sama kamapailubon ni Acting Governor Agnes Magpale ang tanan niyang ikaatbang. Maong diriyot siya mabalhog sa prisohan.

* * *

Pasayloa nga gitaphawan ra ko sa mga rason ni Garcia sa pag-isnab sa arraignment sa tulo ka kasong kriminal nga iyang giatubang sa Sandiganbayan:

* Pagtambong sa gradwasyon: Di dinalian ni mahinungdanon; makagradwar ang mga tinun-an bisan wa siya, gani mas mopaspas ang gradwasyon kun way diskurso sa politiko; gawas pa, masabonan ang kadagkoan sa eskuylahan sa paglapas sa pagdili sa Departamento sa Edukasyon sa pamolitika sa gradwasyon.

* Pagtambong sa barangay assembly: Wa siya kinahanglana, mga molupyo ug mga opisyal sa barangay ray gikinahanglan; kun mapilde karong Mayo, makahimo hinuon pagdagan pagka kapitan karong Oktubre.

* Pag-abli og congressional office: Wa siya kinahanglana, gawas kun siya ray nagtipig sa yawe, sama sa iyang buhatan sa Kapitolyo.

* * *

Sa makausa pa, gipakita na sab sa mga abogado ni Garcia nganong basurahan ang paboritong destinasyon sa kasagaran sa mga kaso nga ilang gipasaka. Bisan klaro nang gimando ni Sandiganbayan Justice Baldos ang pagdakop ni Garcia, nihirit pa gyud sila nga wa pay kamandoan hangtod nga may sinuwat nga warrant of arrest nga maluwatan.

Di gyud tingali dakpunon si Garcia. Kay nagdalidali man pagtugbong sa kaulohan. Hinikalimtan ang orihinal nilang lusot nga isip maoy tinuod nga gobernadora, daghang mas dinalian ug mahinungdanong trabaho ang di niya kabiyaan.

* * *

Si Cris Saavedra, di si Magpale ni si Junjun Davide, ang responsable sa gidangatan ni Garcia. Kay si Saavedra ang nagpasaka sa mga kaso nga nakapaapiki sa suspendidong gobernadora: Ang mga kasong kriminal sa pagpalit sa Balili property ug ang ipasaka na sab nga mga kaso sa Cebu International Convention Center (CICC). Gani, si Saavedra say nitabang ni anhing bise gobernador Greg Sanchez pagpasaka sa mga kasong administratiba nga maoy nakapasuspenso ni Garcia.

Maong may katungod si Saavedra pagpanambag ni Garcia: Mas maayong mopahuway una sa politika aron makatingob sa iyang panahon pagpanagang sa mga kaso nga iyang giatubang. Kun mopadayon si Garcia sa iyang kandidatura, nihulga si Saavedra pagpa-disqualify niya paghupot og bisan unsang katungdanan sa gobyerno tungod sa pagka konbikto na sa kasong administratiba sa transaksiyong Balili.

* * *

Email: [email protected]