Ang bag-ong dalan sa Simbahan

Misugod na sa iyang gimbuhaton sa simbahang katoliko ang bag-ong Santo Papa nga si Pope Francis busa karon nakasab-ay na sa abaga ug liog sa Santo Papa ang yugo sa bug-at niyang mga gimbuhaton ug usa na niini ang mga reporma nga ipatuman sa iyang pagdumala ug pagpamuno sa 1.2 bilyones kapin ka mga katoliko sa tibook kalibotan.

Sa iyang wali atol sa pag-instalar kaniya giawhag ni Pope Francis ang katawhan nga mahimong responsabli sa pagbantay sa tanang mga hinimo sa Ginoo. Sama kang Senyor San Jose nga gihimo sa Ginoo nga magbalantay ug tigpanalipod ni Birhen Maria ug sa simbahan mahimo usab unta kitang responsable nga tigpanalipod niadtong mga hinimo sa Ginoo.

Sa iyang wali ang Santo Papa mihangyo sa mga lider sa mga nagkalain-laing kanasuran ingon man sa mga tawong nanambong nga protektahan ug panalipdan ang kalikopan, dili mahadlok sa paghimo og mga maayo ug kinahanglang abli sa kanunay niadtong mga kabus ug nanginahanglan.

Isip tigpanalipod gikinahanglan usab nga atimanon ang kaugalingon ug limpyohan ang kasing-kasing sa mga kasuko, kaligot-got ug kalagot, kasina ug garbo, dugang pa sa Santo Papa.

Ang wali sa Santo Papa nagtin-aw sa dalan nga subayon sa iyang pagpangulo sa simbahang katoliko sa tibook kalibotan. Gusto sa Santo Papa ang kausaban apan nakaseguro ko nga dili kini sayon nga gimbuhaton kay ang mga pari, obispo ug kardinal nga mga tigpakaaron-ingnon (poyra lang sa mga tarong) dili gayod mouyon.