Atribida
Gipugngan ni acting Governor Agnes Magpale ang pag-release sa mga hinabang financial gikan sa Priority Development Assistance Fund kon PDAF o mas naila nga pork barel ni Kongresista Pablo Garcia.
Gipaagi man gud sa kongresista ang iyang pundo sa lalawigan diin gideposito isip trust fund. Hinungdan nga dili ni niya mabasta-basta pagkuha kun walay pagtugot sa lalawigan.
Ang rason ni Magpale nganong gipugngan ang pag-release sa mga hinabang ni Garcia ngadto sa kalungsoran ubos sa iyang distrito mao nga ila pa nga gisusi kun nasubay ba ni sa Special Allocation Release Order kon SARO gikan sa Department of Budget and Management.
Gilatid man gud didto sa SARO asa mopaingon ang kwarta ug unsay proyekto nga dapatan niini. Gikwestiyon sab ni Magpale nganong mas pinalabi ni Garcia ang lungsod sa Dumanjug.
Tataw nga nalisang si Magpale nga magamit sa politika kun iyang tugotan nga ma-release ang pundo karon nga magsugod na ang kampanya. Apan unsa may iyang mahimo nga dili man iyang kwarta ang maong pundo.
Alang nako way katungod si Magpale nga mopugong sa maong pundo bisan pa og tugotan ta nga dunay gipalabi si kongresista Garcia sa paghatag og hinabang.
Dili katungod ni Magpale ang pagpangitribir sa trabaho sa kongresista ug kun giunsa niini pagbahin ang iyang pork barel. Tulobagon ni sa kongresista ngadto sa iyang mga konstituwente sa distrito.
Igo lang gigamit ni Garcia ang probinsiya nga custodian sa pundo busa walay katungod si Magpale nga mopugong niini. Kun duna may anomaliya sa paggamit sa pundo dili trabaho ni Magpale ang paghimo og pakisusi niini tungod kay dunay Commission on Audit nga mohimo niini.
Gawas pa ang mga proyekto nga gipundohan ni Garcia diha sa iyang distrito pulos na dunay SARO sa DBM.
Way labot si Magpale pag-ila sa mga proyekto tungod kay ang maong katungod iya sa kongresista nga maog tag-iya sa pundo. Kun gusto si Magpale nga manghilabot mas maayong mohimo siya og iyang kaugalingon nga proyekto sa distrito ni Garcia.
* * *
Pipila pa ka adlaw una magsugod ang kampanya alang sa lokal nga mga posisyon apan daghan sa mga kandidato hagbay ra nga nagsugod sa pagpangampanya.
Bisan ang pagbutang og campaign posters dugay ra nilang gihimo. Pero nganong daw sa buta ang Commission on Elections niini?
Apan niadtong tarpaulin sa simbahan nga dunay mga ngalan sa kandidato nga giisip nga team patay tungod sa pagsuporta sa RH Law ug team buhay tungod sa pagsupak niini dali sila nga nikisi-kisi.
Tungod ba kay ang mga hingtungdan kaalyado ni Presidente Aquino? Alang nako wala may kalapasan niini. Apan diay klaro nga violation way gihimo ang Comelec.
Hinaut nga kining tanang lokal nga mga kandidato nga sayo nga nangampanya maisyuhan og notice of violation sa Comelec inig sugod na sa campaign period. Mas labing maayo og dunay mamahimong sample nila ug hingpit gyud nga ma-disqualify.
* * *
- Latest
