Panlantaw nga malaumon

Samtang aduna pa kitay kinabuhi, dili gayud kalikayan nga mabatyagan nato ang kaluhang emosyon nga mao ang kalipay ug kagul-anan. Mag-agad kini sa katakos sa atong kaugalingon, kun giunsa nato pagtumong ang epekto sa panlantaw nga buot masinati. Nagkinahanglan kini’g lawom nga pamalandong.

Adunay mga tawo nga sa atong pagtan-aw ingon sa gisuwerte. Kay lagi sukad nakamatngon og buot, mao may kanunay natagamtaman ang tugob sa kalipay. Wa na gani kaila sa kaugalingon kay gisanapan na ang hunahuna sa makahubog nga kalipay. Nagsusapinday nga maisogon apan huyang sa bugno sa pagsulay.

Kay way kasinatian o kahibalo sa pakigbisog nga molahutay sa iyang nahimutangan. Unta angay nakaandam nga mahimong eksperto sa mga pamaagi sa pagbaton og maayong panlantaw sa kinabuhi. Aron ighasmag sa mga demalas o hadla sa nagkalainlaing tentasyon, maantigo kang mosanta nga dili mapukan.

Ang uban intawon nga bisag gisungog permi sa hilabihang kapit-os o kapait sa ilang kahimtang, gihimo na lang nga kalipay ang ilang pag-antos. Padayong naglaom magkinaunsa man… malaumon sila sa panlantaw nga makab-ot gayud ang pangandoy diha sa giumol nga pagpailob…nga nakasandig sa kahitas-an.

Samtang maglig-on sa paglaom, mabatyagan nato ang kalipay. Kay nakaandam man sa pagdawat sa kamatuoran, nga ang atong kapalaran, gilatid na nga mao gayu’y atong subayon. Bisag dato o kabos, pareho ra nga may mga alantuson sa kinabuhi. Managlahi lang sa diskarte sa panlantaw nga ugmaron.

Busa aron maseguro nga dili mawad-a’g kapuslanan ang atong palaabuton, buhaton nga di lang mamasin, kinahanglan magbaton og kaisog sa pakigharong sa unsa mang babag nga mopatalaw sa kainit sa panlimbasog.  Mapakyas man..padayon sa kadasig nga malaumon sa panlantaw hangtud nga kita molampos.