Type O wa angkona ni Kong. Osmeña

Ang Pasil maoy lugar sa Cebu City diin imong mapalit ang nagkalainlaing pagkaon nga gitawag og exotic food nga ang kadaghanan niini gidili na ang pagbaligya.

Ang mga himalitan nga pagkaon sa Pasil mao ang linarang nga pawikan, ba-o, iho, kiampaw, ubod (indong), bakasi, ug uban pa. Anaa usay kaldereta nga iro.

Nakadungog pa gani ko nga anaay mag-ihaw og iring sa maong dapit.

Bisan sa kainit ug kahasol sa pagkaon dinhi apan gidugok kini dili lamang sa mga ordinaryong trabahador kun dili apil ang mga taga-opisina.

Bisan og gidili sa balaud ang pagsilbi sa ubang mga kalan-on apan nagpadayong gidugok sa katawhan ang negosyo sa atong mga kaigsoonan sa maong dapit.

Kun wa pay daghang mangaon sa Pasil dugay na untang nanira kining mga tindahan og mga pagkaon nga mapalit lamang sa maong dapit.

* * *

Wala angkona ni Kong. Tomas Osmeña ang mikatap nga propagandang Type O.  Gipapilit kini sa nagkadaiyang mga dapit apil na sa mga barangay hall kang kansang barangay kapitan (chairman) dumadapig ni Kong. Osmeña.

Giangkon na sa hapit tanang mga sakop sa Bando Osmeña - Pundok Kauswagan (BOPK) nga ila kining political propaganda. Gani ang mga tawo nasayud na usab niini.

Apan karong bag-o, sumala ni Kong. Tomas nga dili siya maoy tag-iya niining Type O kun dili nakarehistro kini sa usa ka garment manufacturer.

Sa ato pa, pwede diay kining maong propaganda nga magpadayon pagpilit sa nahimutangan niini kay dili man diay kini political propaganda. Anong say mo Commission on Elections (Comelec)?

* * *

Kun mao kini dakong tulubagon sa mga tawong nagbitay niining Type O sa mga barangay halls ug ubang government buildings?

Nganong gipropagar man sa mga barangay kapitan ug sa ubang mga opisyal sa gobiyerno kining usa ka kompaniya nga gipanag-iya sa pribadong tawo? Naa ba kini kontrata ug gibayran ba sila niini o nag-abang ba kini sa mga barangay halls? Hain man ang abang mapunta?

Makahimo diay ang tanang mga pribadong kompaniya sa pagpamitay ug pagpapilit sa ilang mga propaganda sa mga barangay hall sama sa gihimo sa Type O.

Mas lisud na man hinoong tubagon sa mga barangay kapitan kining pangulipas ni Kong. Osmeña.

* * *

Pastilang daghanang infrastructure projects karon dinhi sa Metro Cebu. Giayo ang duha ka taytayan nga nagdugtong sa Mandue ug Mactan ingon man ang daghang kadalanan sa Metro Cebu.

Nahibulong ang ubang mga tawo kun nganong giguba ang kadalanan sa amihanang bahin nga maayo pa man kini. Sama usab sa North Reclamation Area nga giguba gayud ang dalan inay nga mahimo lang kining ayum-ayumon.

Nagduda na baya ang katawhan sa tinood nga katarungan niining pagpatuman og mga proyekto sa gobiyerno. Gawas sa kickback makahatag pa gayud kini’g kahasul sa katawhan.

* * *

Alang kanako husto ang hukom ni Incumbent Gov. Agnes Magpale nga ibilin ang Cebu International Convention Center (CICC) sa iyang pagka-convention center.

Angayan lang nga ang usa ka premier province sama sa Sugbo magbaton og usa ka first class (international standard?) nga convention center.

Mahimong anomaloso ang pagkatukod niining maong edepisyo apan karon nga anaa na kana kinahanglang ato kanang ayuhon ug galmon.

* * *

Email: [email protected].