Para eleksiyon?

Timailhan na ba nga wala nay kuwarta ang mga Garcia nga ikasugakod hangtod sa Mayo 13 mao nga nagkadagmadagma kini og gukod sa P55 milyones nga tseke gikan sa P56.3 milyones nga pork barrel ni Kongresista Pabling Garcia?

Ang anak mismo ni Noy Pabling nga si Dumanjug Mayor Nelson Garcia ang naggukod nga i-release ang maong tseke.

Kay ang Department of Budget and Management sa kauluhan adunay advise kang acting Gobernador Agnes Magpale kabahin sa pag-release sa maong tseke, nga angay lamang kini gamiton alang sa pagpaayo sa barangay roads, electrification, repair, Philhealth, feeding, social services, ug uban pa. Apan ang gusto ni Garcia nga adto kini ihatag deretso sa Dumanjug ug sila na lamang ang mo-apod-apod sa pundo ngadto sa ubang lungsod. Kaha? Gamiton ba kaha sa proyekto nang kuwartaha o sa eleksiyon?

Ang PDAF nga angayan sa kalungsoran i-agi gyud sa gobernador, uban ang bise gobernador ug pinaagi sa tresurero sa lalawigan ug kun magkina-unsa, pananglit gastohon sa mga lungsod sama sa Dumanjug ang pundo nga dili sibo sa gimbut-an sa Special Allotment Release Order (SARO), sila maoy manubag sa Ombudsman.

Pananglit iwaldas ni Nelson Garcia ang pundo o gamiton niya kini sa eleksiyon, ang maposasan si Magpale ug ang tresurero. Magngisi ra gyud siya.

Apan wala ko mahibulong nganong gidaginot og gukod ni Noy Pabling ug ni Nelson Garcia ang P55 milyones. Apan misangtop sa akong utok ang nahidangatan kang Gwendolyn Garcia nga wala nay access sa pundo sa Kapitolyo human gisuspenso sa Office of the President niadtong Disyembre 2012.

Kun tinuod nga wala na silay kuwarta nga ikasugakod hangtod sa Mayo 13 nga eleksiyon, mangita gyud sila og mga pamaagi nga makakita og kuwarta.

Sumala pa sa mga tigpaniid sa politika sa lalawigan sa Sugbo, ang dag-anan sa mga Garcia niining eleksiyona dili ang limpyo ug tunhay nga eleksiyon, apan pinaagi sa kuwarta.

Nasayod ang mga Sugboanon sa mga kaso ni Gwendolyn Garcia, ilabi na kanang kaso sa pagpalit sa Balili property nga P95 milyones apan halapad niini naglubog sa tubig dagat. Ang kaso anaa na karon sa Sandiganbayan.

Wala pay labot sa giingong ‘overpricing’ sa Cebu International Convention Center (CICC) nga posibleng isang-at na sa Sandiganbayan sa dili madugay.

Kining mga kasoha ang hinungdan nga kadaghanan sa mga Sugboanon sama nako naglantaw nga dili na ganahan nga usa ka Garcia ang palingkoron diha sa Kapitolyo.