Paghugas sa kasal-anan

Nagsugod na ang Lenten Season. Kini ang panahon nga   handumon na usab ang pagpakasakit ug pagkamatay ni Hesukristo sa krus, kay matud pa lagi sa naandan nang pagtuo natong mga Kristiyano, panahon usab sa pagbukas sa atong kasal-anan.

Unsa ba gayod ka tinuod ug ka kinasingkasing kining mao natong pagtuo? Ang uban moingon, nga anak kita sa pagpakasala. Husto kini kay si Adan ug Eba nga atong mga ginikanan nakasala man sa gipuy-an nilang Paraiso. Ang dako nilang sala mao ang pagsupak sa gipahimangno kanila sa Ginoo nga dili mokaon sa gidili nga prutas.

Aduna usay uban nga moingon, nga ang pagpakasala bunga sa kahuyang sa tawo kay dali rang matental sa yawa sa paghimo og kasal-anan. Husto usab kini, kay kita tawo lang nga mapukan ang kalig-on sa higpit nga pagtental ni Satanas sa pagpakasala.

Ang argumento mao, kun natental si Adan ug Eba sa pagpakasala sa Yawa, kita pa kaha nga mga tumaw na lang nila? Si Adan ug Eba gituyo gayod sa paglalang sa Ginoo aron adunay tawo nga mopuyo sa gibuhat Niyang kalibotan uban sa mga mananap, mga langgam ug mga isda.

Sumala sa mabasa nato sa Bibliya, gitugotan sa Ginoong Amahan si Satanas sa pagdani kanatong mga tawo sa pagpakasala, ug apil na niini sila si Adan ug si Eba. Sa unsang rason? Aron pagsukod sa atong kalig-on ug pagtuo sa Diyos.

Mao nga karon, daghan gayod kanato ang naglunang sa kasal-anan. Milampos si Satanas sa ubang mga linalang sa Ginoo sa pagbuhat og mga sala.

Unsaon pagsagang ug pagbatok sa tentasyon ni Satanas? Ang lig-ong pagtuo sa Diyos ug ang makanunayong pag-ampo maoy bugtong paagi sa paglikay sa pagpakasala. Pinaagi niini, mahalikay kita sa tentasyon. Ang pagpaduol kanunay sa Ginoo maoy tukma ug lig-ong panalipod aron makasukol kita sa awhag sa pagbuhat og sala.

Panahon karon sa paghugas sa atong mga sala. Dili pa ulahi aron hingpit kitang makalikay sa pagpakasala. Lig-onon nato ang atong kaugalingon diha sa kinasingkasing nga pag-ampo ug tumang kalig-on sa pagtuo ngadto sa Labaw nga Makagagahom.