Batuhan wa magkomedya

Mopasaka g’yud og reklamo si Atty. Aristotle “Totol” Batuhan adto sa City Council’s committee on ethics kabahin sa isyu nga pag-insistir ni Konsehal Rodrigo “Bebot” Abellanosa nga mahimo siya nga sakop sa City Scholarship Program committee.

Kwestyonon ni Batuhan ang pagkasakop ni Abellanosa sa scholarship committee sa dakbayan nga unta maisip man kini nga “conflict of interest” kay matud niya si Abellanosa padayon man sa iyang katungdanan pagka presidente sa Asian College of Technology (ACT).

Usa sa rason ni Batuhan pag-adto sa City Hall kagahapon mao ang pakigkita unta ni Mayor Michael Rama kay mokunsolta siya sa angay niyang himoon kay hangtud karon wala gayud motubag si Abellanosa sa reklamo nga iyang gipasaka sa Malacañang.

Gipasakaan man gud ni Batuhan og kaso nga administratiba si Abellanosa didto sa Office of the President (OP) tungod sa gihulagway niya nga “conflict of interest” kay ang ACT apil man sa nakabenepisyo sa scholarship program sa dakbayan sa Sugbo.

Bitaw, ang tinuod akong gikuhaan og pamahayag si Konsehal Abellanosa kabahin sa kaso nga gipasaka ni Batuhan kaniya apan dili man ganahan nga motubag kay ang iyang rason mahadlok kuno siya nga masakyan ang “political gimmick” ni Batuhan.

Dili na gani ganahan motubag si Konsehal Abellanosa nako nga kaniadto amigo man kaayo mi. Unsa kaha ang gusto ni Abellanosa, dili lang nako ibalita ang mga isyu ni Totol kaniya?

Si Totol miingon nga mohimo usab siya og laing reklamo batok ni Konsehal Abellanosa didto sa Bureau of Internal Revenue (BIR) apan gitun-an pa niya ang iyang mga argumento.

Gusto ni Totol nga dili na ilakip ang Asian College of Technology sa mga tunghaan nga i-accredit sa dakbayan sa Sugbo sa iyang scholarship program. Apan si Mayor Michael Rama dili usab pabor niining sugyot ni Totol.

Awhag nako ni Konsehal Abellanosa nga kun adunay isyu tubaga lang gud, ayaw pagsuko-suko ug nga dili ka na motubag sa isyu.

* * *

Kanindot sa hukom ni Mayor Rama nga gisalikway niya ang sugyot nga balikan na paghatag og binuwan nga cash allowance ang mga gwardya sa Cebu City jail.

Ang mihimo sa sugyot mao ang presiding officer sa Police Coordinating and Advisory Council (PCAC) nga si Engr. Eugene Elizalde. Nalooy si Elizalde kay kun dunay mga gwardya nga nakasala, nganong iapil man kuno ang uban?

Ang iyang argumento nga ang mga polis bitaw kuno duna man ‘say mga badlongon apan nganong wala man lagi sila putli sa ilang binuwan nga cash allowance?

Dugangan nako ni sa sunod nato nga lindog.