Suliran sa gugma

Nakadawat kita’g suwat gikan sa usa ka inahan kinsa dunay problema sa iyang anak dalaga. Ang dalaga niyang anak nagpangidaron og 29 anyos.

* * *

Ang mao niyang anak, suma pa sa iyang suwat, usa ka “collector” -- dili sa stamps o mga ballpen ba. “Collector” kini og mga uyab. Si Misis tawon hapit kuyapi dihang giprangkahan siya sa iyang daga nga duna siya’y upat ka buok uyab ug iyang gihigugma ang kada usa.

* * *

Ang inahan, kang kansang bana atua magtrabaho sa Kuwait, nangayog tambag kabahin sa iyang problema. Dili man gud maminaw, ug gani masuko pa si anak, kun iyang maymayan.

* * *

Kay dili man kita magtatambag kalabot sa gugma, ilabi na gugmang daghang nag-angkon, ato rang gitambagan si Misis sa pagdala sa iyang suliran ngadto sa kaliwat ni Manding Karya kinsa makahatag kaniya’g haum nga solusyon.

* * *

Ambot kun kining matanga sa problema kahatagan og kasulbaran sa RH law. Diin dakong pagsalig sa mga tigpaluyo niini nga makaayo sa atong sosyedad kon katilingban Pinoy.

* * *

TRIVIA. Salamat ngadto ni Nando Atubili sa Ormoc City sa iyang pasalig nga magpadayon ang iyang banay sa pagsuporta sa Banat News sud ning tuig 2013.