Ayaw g'yud pailad

Ayaw lagi mo og kompyansa anang mga mangingilad nga anaa sa mga department store, ang uban diha magkorbata (neck tie) pa.

Duolon na gani mo og mga tawo, apil mga babaye, unya awhagon mo sa pag-scratch og coupon, dayon patoohon mo nga nakadaug, biyai dayon kay mangingilad na.

Usa ka opisyal og insurance company nangayo na’g pasaylo nako niini kay gibiktima ko sa iyang mga kawani. Tiaw mo, daghan pa man diay ang nabiktima niining maong modus.

* * *

Gisusi nako sa City Hall kun kinsa ang giisyuhan sa Toyota Hilux nga SKV-459 nga giingong maghatud og bata nga anaa magtungha sa usa ka Learning Center sa Calamba, iya diay ni Kalubihan Barangay Captain Carmelo Milan.

Capt, palihug hunonga na ang pagpagamit sa sakyanan nga isyu nimo sa City Hall alang sa personal nga tumong. Kinsa ba kining bata nga kanunay ihatud?

Unya, kadtong sa Hilux gihapon sa Barangay Babag nga maghatud ‘sab og bata sa Talamban (SKV 526) naundang na ba? Pastilan, mauwaw tawon ta uy.

Kwartahan man g’yud kining mga kapitan pagpalit mo’g kaugalingon ninyo nga sakyanan ayaw gamita ang sakyanan sa kagamhanan sa inyong personal nga gamit.

        Kadtong mipadala nako og text messages kabahin sa pagsiaw sa masyaw ug ubang illegal nga sugal, dili na lang nako ipublikar kay pwerteng daghana g’yud.

Duna ko’y himoon niini karong pipila ka adlaw. Ang nindot, hatagan ko ninyo sa ngalan, ilabi na sa report kabahin sa mga drug pushers kay aron itugyan nato sa mga otoridad.

May mireklamo kabahin sa mga PUJ nga magdagan nga wala’y suga panahon sa gabii. Kaniadto, dakpon g’yud nako pero karon gud, tagsa na lang ko magmotor, lisud kaayo ang pagdakup.

Kun mag-operation gud mi sa LTO, mopasiga man g’yud na sila sa suga gawas sa mga depektoso. Dili g’yud ko malooy mosakmit sa lisensya anang drayber nga dili magsuga panahon sa gabii.

Atensyon mayor sa Consolacion, ang imong mga botante sa Sitio Laray mireklamo kay wala nimo matagad ang pagpaayo sa gubaon kaayo nila nga karsada.

Gireklamo ‘sab sa katawhan ang kapakyas sa mga enforcers sa Talisay pagpahapsay sa paghuot sa sakyanan ilawom sa flyover sa Tabunok.

Mga sakop sa CITOM nga nadistino sa “field” mireklamo kay wala pa kuno ipanghatag ang ilang clothing allowance unya ang taga opisina human na. Ngano man ni?

Kinsa man kining drug pusher diha sa kilid sa Top Builders sa Ingles-V Rama nga “tawo” sa usa ka konsehal? Ok ra nimo konsehal nga imong bata-bata drug pusher?

Ang inyong reklamo i-text lang sa 0933-570-0853. Pero usahay, di lang nako tubagon ha?