Manomano nga piniliay sa Vatican

Way PCOS machines sa pagpili sa bag-ong Santo Papa. Ang mga lagda sa piniliay wa matandog sa bag-ong mga teknolohiya. Abundang mga detalye sa conclave, ang tigom sa 115 ka kardinal nga mopili sa mopuli ni Benedict XVI, ang katinagoan ini ug ang panumpa sa mga kardinal pagtak-om sa tanang panghitabo sa Sistine Chapel.

Samtang nagkaduol nang lokal ug nasudnong piniliay karong Mayo 13, ug aron pagtandi sa naghinobrang pangampanya sa gawas ug sa tinagoang kampanya sud sa Vatican, atong saw-an ang proseso sa usa sa labing kontrobersiyal ug tinagoan nga politikanhong kalihokan sa kasaysayan.

* * *

Sa unang adlaw sa conclave, nga posibleng matakda karong semanaha, way botasyon sa buntag. Nga igahin pagpaminaw sa duha ka sermon nga motuki sa mga panginahanglan sa Simbahang Katoliko ug sa mga mithi nga angay’ng huptan sa sunod nga Santo Papa. Himuon ang unang botasyon sa hapon. Kun way makakuha og 2/3 nga mayoriya, upat ka botasyon ang himuon sa ikaduhang adlaw: Duha sa buntag ug duha sa hapon.

Kun way mapili sa tulo ka adlaw nga botasyon, suspensuhong piniliay alang sa pangaliya ug mensahe sa senior Cardinal Deacon. Kun way mapili sa pito ka botasyon, maminaw ang mga kardinal sa mensahe sa senior Cardinal Bishop. Human sa pito ka botasyon, himuong pangaliya, pamalandong ug panagsulti. Sa ika-34 nga botasyon, ang duhang nakakuha sa labing daghang boto mao na lay iapil sa balota, apan did-an pag-apil sa botasyon.

* * *

Matag kardinal hatagan og duha ka balotang suwatan og “Eligo in Summum Pontificem (Akong Pilion nga Santo Papa)”. Samtang magsuwat ang mga kardinal sa ilang boto, ripahon ang siyam ka ngan: Ang unang tulo maoy tig-iskutenyo, ang ikaduhang tulo manguha sa mga balota sa masakitong mga kardinal ug ang ikatulo mosusi sakto bang ihap.

Uban ang sinuwatang balota, ang mga kardinal moduol sa altar nga maoy pahimutangan sa kahon. Matag kardinal molitok sa Latin sa “Ako motawag isip saksi ni Kristo nga akong maghuhukom, nga ang akong boto gihatag ngadto niya nga atubangan sa Ginoo maoy akong gituohang angay’ng mapili.”

* * *

Kun masud nang tanang balota, uyugon ang kahon sa di pa iskutenyuhon. Kun ang gidaghanon sa balota di motakdo sa mga kardinal nga nanambong, di basahon ang mga balota, sunugon ug magbotasyon pag-usab. Kun way depekto, bukharon ang matag balota ug ang tulo ka tig-ihap buwag nga mosuwat sa ngan sa balota. Ang kataposang tig-ihap maoy mokusog pagbasa sa ngan.

Human sa iskutenyo, sublion sa ikatulong grupo sakto bang ihap. Sunugon dayong mga balota. Kun way nidaog, sagolan og basa nga dahon aron itom ang aso. Karong bag-o, sagolan nag kemikal aron pagsegurong puti ang aso, ug dasonan og bagting sa mga kampana, kun may mapili na.

* * *

Email: [email protected].