EDITORYAL - Sa Bacolod City Team Patay ug Team Buhay

Gipasiugdahan kini  sa  mga  paring Katoliko  kinsa  napungot  pag-ayo  sa   mga  senador  kinsa mipabor  sa RH Bill. Gihimong  kampanya  sa  mga kaparian  didto     nga kadtong  mga senador  nga  mipabor  sa RH Bill  gibunyagan nila  nga  sakop  sa Team  Patay, samtang  kadtong  wa  moendurso  sa RH Bill  ilang  gibunyagan  og  Team                 Buhay.  

Sa gula  sa The Philippine Star ning petsaha  Pebrero 26, 2013 gihinganlan nila  ang mga  kandidato sa Team  Patay  nga  mao  sila si Kongresista Juan Edgardo Angara  sa Aurora, Senador Alan Peter Cayetano, Loren Legarda ug Francis Escudero. Di man ni pag-unsa  pero  gitataw  sa atong  batakang balaod  ang  panaglahi  sa  estado  o  sa goberno  ug  sa relihiyon.

Kun  ikaw  anaa  sa  pangatungdanan  sa goberno,  ang  imong  kinabuhi  ug panahon  anaa  nimo  ibuhis sa pagserbisyo  sa nasud  ug  sa katawhan  niini.

Samtang  kun  anaa  ka mangatungdanan  sa usa  ka relihiyon, di ka ordinary  nga  opisyal  sama  sa  mga  opisyal  sa nagkalainlaing  organisasyong sibiko, kundi  usa ka opisyal  nga halangdon  ilabi  na  kun  ang  imong  relihiyon  nga  gidumala  tinuod  nga relihiyon  ni Cristo  nga  nagpaabot  sa Iyang  pagbalik  aron  mokuyog  Kaniya  sa langit.

Dako  ang  imong  trabaho  kay  sa trabaho  sa mga  politiko. Kay  ang  mga  politiko  maningkamot  nga  madumalahan  nila  pag-ayo  ang  katawhan  aron  mahimong  maayong  lungsoranong  Filipino  apan  bahin sa kaluwasan  sa kalag  sa pag-abot  sa adlaw  sa paghukom, wa silay kabangkaagan  niini.

Ang  trabaho  sa usa  ka  tinuod  nga  lider  sa relihiyon  mao  ang  paggiya  sa iyang  mga  sakop  nga  makatuman  sa mga  sugo  ni Cristo  ug  sa Dios  aron masiguro  nga  sa adlaw  sa paghukom  maluwas  siya   ug  ang   iyang  gilideran  nga mga  sakop.

Busa  wa kay labot  sa mga  politiko  sa  ilang  pagdumala  sa goberno sa nasud kay  lahi  sila  og  misyon  kay  sa imong  misyon  diha  sa imong  relihiyon.

Kay  kun  gusto  kang  mosalmot  sa pangatungdanan  sa goberno, aw biyai  ang  imong  katungdanan  sa relihiyon kay  ang  lider  sa tinuod  nga  relihiyon magpasakop  sa balaod  sa goberno  kay  sugo  kini  sa Dios.

Busa  di nimo  siya madungog  nga  sa ilang  pagsimba   iyang itudlo  sa iyang  mga  sakop ang  pagdaot  sa mga balaod  sa goberno tungod  kay  supak kini  sa sugo sa  Dios, ug respetado siya  sa balaod nga nagbuwag  sa relihiyon ug goberno.