Bililhong gasa sa People Power

Usa sa labing bililhong gasa, apan mao say labing nataligam-an, sa ika-27 nga sumad sa Edsa People Power Revolution mao nga nakaangkon ta og presidente nga di kawatan. Tulo ka tuig human sa iyang pagbanos sa Malakanyang, si Presidente Noynoy Aquino di pa matulisok nga nahilambigit og bisan unsang eskandalo.

Ni ang labing sinaligang mga opisyal nga naglibot niya. May mga pasangil nang nitumaw batok sa pipila niya ka tinudlo. Apan way napakita nga mga ebidensiya ug naningog nga mga saksi. Sukwahi sa kaabunda sa mga saksi ug mga ebidensiya sa NBN-ZTE, Hello Garcia ug ubang mga eskandalo sa niaging pamunoan.

* * *

Talagsaong ebidensiya sa kalimpiyo pa sa pamunoang Aquino mao ang kalidad sa politikanhong oposisyon. Ang labihang hinawayon, nga wa na lang sab gyoy lakang si Aquino nga sakto, mao ang nagkatibuwaag nga mga itoy ni kanhi presidente Gloria Arroyo. Maong di ikahibung nga wa nay motuo nila.

Ang mas dakong puwersa sa oposisyon, ang United Nationalist Alliance (UNA), hangtod karon wa pang kahukom unsaon sa pagpamostura sa kampanya sa piniliay karong Mayo 13. Hingpit na ba gyud nga mobatok sa Malakanyang? O padayon nga mokumpayot iyawat mapiskan sa kadungganan sa maayong mga buhat ni Aquino?

* * *

Di anghel si Aquino. Daghan uyamot ang iyang depekto. Hangtod karon wa pang kalingkawas gikan sa karaang personal nga mga atraso. May pipila niya ka tinudlo nga kuwestiyonable. May pipila ka binuhatan nga nagmatuod nga hilaw pa ug wa pa gyud hingpit nga makakalawat sa higanteng mga responsibilidad sa paghupot sa labing taas nga katungdanan sa nasud.

Apan kasagaran sa mga sipyat ni Aquino nanukad sa kakuwang og pangandam kay naahat ra man paglusad ang iyang kandidatura. Sa way paghisgot sa iyang mga bulilyaso tungod sa way kinutoban nga mga panginsulto ug pakauwaw nga gipasiugdahan sa iyang mga kaatbang.

* * *

Nagdumili si Aquino pag-certify nga urgent ni pag-apura sa iyang mga alyado sa Kongreso pagpasar sa Freedom of Information (FOI) bill. Nga dako unta og ikatabang sa pagpalambo sa katungod sa katawhan pagpakisayod sa mga transaksiyon sa gobyerno. Apan wa ni magpasabot nga duna siyay mga anomaliya nga gilumloman. Tungod lang ni kay nabiktima sa pangabuso sa kurakot nga mga sakop sa media atol sa kampanya sa piniliay niadtong 2010.

Si Aquino gitunglo sa mga turutot ni Arroyo nga maoy labing tapolan ug labing way nahibaw-an sa tanang presidente. Apan ambot may makaambas ba sa pasiunang kadaogan sa iyang kampanya batok sa pangurakot, pagpalambo sa nasudnong ekonomiya ug, labaw sa tanan, pagpatunhay sa kaligdong sa demokratikanhong mga institusyon sa nasud. Aron nga ang makiangayong kausaban magpadayon bisan kinsay magtungkawo sa Malakanyang.

* * *

Email: [email protected].