Pagpamalandong alang sa Malangkubong Kaayohan

 A. Gingharian sa Dios batok sa Gingharian ni Satanas

Nahimong unod ug tumong sa pagtulon-an ni Jesus ang Paghari sa Dios. Sila si Michael Scanlan, TOR ug Randall J. Cirner ang nihimo ning maong paglangkob kalabot sa Paghari sa Dios:[1]

1.  Ang paghari sa Dios niabot sa kalibutan pinaagi ug diha kang Jesus.

2. Ang tanang katawhan kinahanglang mosulod sa maong Gingharian sa Dios aron maluwas.

3. Ang Gingharian sa Dios nagpasabot og Pagkagun-ob sa Gingharian ni Satanas.

4. Mahatagan og katumanan ang Gingharian sa Dios ingon man ang Pagkagun-ob sa hingpit sa Gingharian ni Satanas diha sa Ikaduhang Pagbalik (Parousia) ni Jesu-Kristo.

Adunay panagbangi ug pagsumpaki tali sa duha ka mga Gingharian. Ang Gingharian sa Dios nga giumol ni Jesus ug ang Gingharian ni Satanas nga padayong mihatag og kakuyaw ug hulga sa mga anak sa Dios. Si Jesus mismo ang nipasidaan sa iyang mga tinun-an: “Mga anak lisud gayud ang pagsulod sa Gingharian sa Dios”[2] dugang pa gitataw kini ni Jesus sa dihang usa ka higayon niana siya gipasanginlan nga giyawaan: “Dili si Satanas kondili ang Espiritu sa Dios maoy naghatag kanako’g gahom sa pagpagula’g mga yawa ug nagpaila kini nga niabot na kaninyo ang paghari sa Dios.”[3] Tumong sa maong Paghari sa Dios mao man ang kalingkawasan ni bisan kinsa gikan sa bisan unsang kaulipnan[4] apil na niini ang kaulipnan sa sala, sa dautan, ug sa bakak. Kay matud pa: Ang kamatuoran maghatag sa tawo og kagawasan.[5] Ato kining malangkob pinaagi ning maong tudling:

“Ang Espiritu sa Ginoo ania dinhi kanako. Gidihogan ako niya aron pagsangyaw sa Maayong Balita ngadto sa mga Kabos; Gipadala ako niya aron pagsangyaw sa kagawasan ngadto sa mga binihag ug pagpahiuli sa panan-aw sa mga buta, pagpagawas sa mga dinaugdaog ug pagpahibalo sa tuig nga ang Ginoo moluwas sa iyang katawhan.”[6]