Tihik o kuripot

May mga sitwasyon, nga usahay masaypan nato ang tawo nga dili maayo ang iyang pagkatawo, gumikan sa iyang kinaiya nga tihik o kaha kuripot. Dili baya kini dautan, kun maantigo ka lang mobalanse sa batasan nga ingon niani. Mas bentaha gani kini kay sa mahimo kang gastador, nga way  pakabana sa epekto.

Kun sobra ang pagka-kuripot mahimong momugna kinig kadaut dili lang sa pagkatawo mo kun di mismo sa kaugalingon mo. Sama pananglitan niini, nga nagkinahanglan ka’g sustansyadong pagkaon makatulo apan sa kakuripot wa mo kini buhata kay nagdaginot ka bisan kini kinahanglanon kaayo sa panglawas mo.

Kay nahadlok kang makuhaan ang tinigom mo, hangtud nasakit kag kulang pa sa pagpatambal ang galastohon. Unya naputos sa utang sa paningkamot nga mabuhi, apan nawad-an sa paglaom nga nakapadali sa iyang kamatayon. Mao kini ang epekto, sa way paghunahuna o pagdumala sa husto nga paggasto.

Mas maayo pa ang tihik nga kun mogasto man, mag-agi pa kini og mga proseso sa pagseguro nga kini gikinahanglan gayud sa sitwasyon. Segurista ug dili buot mogasto nga way kapuslanan. Mopahimulos sa mga oportunidad aron madugangan ang tinigom. Mangutang pa man gani aron nga moganansya pa.

Sa katilingban, dalaygon kaayo ka nila kun maantigo ka lang modiskarte sa pagkatihik o pagkuripot. Nga dili ka masaypan nga dawo o hakog, kay nigahin ka man diha sa kasingkasing mo ang isig katawo — ang pagtabang sa nanginahanglan gayud, aron maipakita ang bahin sa imong maayong pakigsandurot sa katawhan.

Mahinungdanon kaayo ang tiunay nga pagtagad sa mga tawo kay sila man ang mahimong katambayayong, tulay, nga kapahinungdan sa kalampusan mo. Ang pagpasalamat sa Dios, mabatyagan mo ang di matukib nga kalipay pinaagi sa imong pagtabang sa uban nga way pagpaabot nga ikaw kasuklian.